धरान । अन्तर्राष्ट्रिय परदेशी साहित्यिक समूहले बुधबार पुस्तक लोकार्पणसहित पुस्तक परिचर्चा कार्यक्रम सम्पन्न गरेको छ ।
समूहले प्रकाशित गर्दै आएको ‘परदेशी बिम्ब’ को लोकार्पण गरिएको छ । पुस्तकको भाषाविद् प्रा.डा. टङ्कप्रसाद न्यौपाने, नेपाल संस्कृत विश्वविद्यालयका शिक्षाध्यक्ष प्रा.डा. भीमप्रसाद खतिवडा, अध्यक्ष सुरेन्द्र लिम्बू परदेशीलगायतले विमोचन गरे । यस क्रममा दुईवटा कविता सङ्ग्रह र कथा सङ्ग्रहको विषयमा परिचर्चा गरिएको छ । कवि कृष्णप्रसाद गौतमको लोकबेँसीको स्पन्दन कृतिमाथि कवि टीका आत्रेयले परिचर्चा गरिन् । उनले कृतिको आवरण पृष्ठमा रहेको चित्रले समग्र पहाडी जीवनको चित्रण गर्ने बताइन् ।
‘कविता सङ्ग्रहको कभर नै समग्र पहाडी जीवनको चित्रण नै कविता भएर बसेका छन्’–उनले भनिन् । उनले समसामयिक विषयवस्तुमाथि लेखिएको कविता रहेको बताइन् । यस कविता सङ्ग्रहमा रहेका कविताहरू भाग्य खोज्दै हिँड्ने हाम्रो वर्तमानका विषयमा पनि लेखिएको छ । उनले भनिन्, ‘भाग्य खोज्दै हिँड्ने हाम्रो वर्तमान हो । कहिलेसम्म हिँड्नुपर्ने हो ।’ गौतमका कविताहरू अन्तरहृदयबाट लेखिएको बताइन् ।
यस्तै सुनिता राई कन्दङ्वाको कथा सङ्ग्रह तिउरीमाथि कथाकार जनकऋषि राईले परिचर्चा गरे । उनले १३ वटा कथाहरू महिला वरिपरि नै घुमेको बताए । ‘हरेक कथाका कथानकहरू महिलासँग जोडिएका छन्, महिलाकै वरिपरि घुमेको छ’ –उनले भने । कतिपय स्थानमा कथाकार नै अल्मलिएको हो कि जस्तो लाग्ने उनले बताए । सुनाखरी र श्रद्धाञ्जलि कथा अधिक लामो भएकाले कथानक नै बीचमा हराउने र कहाँ जोडिन्छन् भन्ने पाठकलाई लागिरहने किसिमको भएको उनले बताए । ‘कथानकमा केही कमजोरी पनि रहेको छ’ उनले भने, ‘तर, पनि इजरायलमा बसेर कथा लेख्न सफल भएकोमा बधाई दिन्छु ।’
![](/uploads/advertise/online ad_1719397537.jpg)
यस्तै सुरेन्द्र लिम्बू परदेशीको नयाँ कविता कृति हामी आयामका भूइँमान्छेहरूमाथि प्रा.डा. भीम खतिवडाले परिचर्चा गरेका थिए । उनले कविता मुटुको भाषा रहेकाले अलिकति स्वाभिमानको कुरा, अलिकति पहिचानको कुरा, अलिकति देशप्रेमको कुरा, अलिकति सद्भावको कुरा कृतिमा रहेको बताए । २० वटा कवितामा विज्ञान प्रविधिको कुरादेखि संसारका सबै कुरालाई अटाउन सफल भएको उनले बताए । उनले यस कृतिमा मोबाइल संस्कृतिले पठन संस्कृतिलाई खत्तम पारिसकेको विषयलाई पनि उठान गरिएको छ ।
‘पढ्न आग्रह गरिएको छ’–उनले भने । कार्यक्रममा अध्यक्ष लिम्बूले आफ्नो बाबा भीमबहादुर लिम्बूको नाममा स्थापना गरिएको भीम स्मृति साहित्यिक सम्मानबाट मधु माधुर्यलाई सम्मानित गरिएको छ । यस्तै भीम स्मृति साहित्यिक पुरस्कारबाट कवि दीपक सुवेदीलाई पुरस्कृत गरिएको छ । उनलाई १५ हजार पाँच सय ५५ रुपैयाँ नगदसहित प्रमाण–पत्रले पुरस्कृत गरिएको छ । यसैबीच गजलकार लक्ष्मण कट्वाल, रोमु अधिकारी, कवि सुकमतीकला राई, गगन योक्पाङ्देनलगायतले कविता वाचन गरेका थिए ।