Trending Tags

‘कोरोना महामारी एउटा सुनौलो अवसर हो’

alt
  • आश्विन २, २०७७
  • ब्लाष्ट खबर

उच्च शिक्षालय तथा माध्यमिक विद्यालय सङ्घ नेपाल (हिसान) सुनसरीका अध्यक्ष मुकुन्द घिमिरेसँग कोरोना महामारीका बेला शैक्षिक गतिविधि सञ्चालनबारे गरिएको संक्षिप्त कुराकानीः

कोरोनाले शैक्षिक प्रणालीलाई प्रभावित पार्ने यस्तो सम्भावना देख्नु भएको छ ?
–कोरोनाले विश्वको आर्थिक, सामाजिक, सांस्कृतिक र शैक्षिक क्षेत्रमा ठूलो प्रभाव पारेको छ । यसले जीवनका अन्य महत्वपूर्ण क्षेत्रजस्तै शिक्षा क्षेत्रमा पनि गहन असर गरेको छ । यसको प्रभावले परम्परागत शिक्षण सिकाइका कतिपय मूल्य र मान्यतामा परिवर्तन गर्ने सङ्केत पनि दिएको छ । कतिपय समस्याहरूका अलावा पनि हालको शैक्षिक प्रणालीमा सकारात्मक र गुणात्मक आयाम थपिने विश्वास गर्न सकिन्छ । यो चुनौतीले दिएको उज्यालो पक्ष हो ।

चालु वर्षको शैक्षिक सत्र त प्रभावित नै बनाएको भनेर रोइलो भइरहेको छ ? सरकार गैरजिम्मेवार बनेको हो ?
–यसमा सरकारलाई दोष दिएर हामी पन्छिन सक्दैनौं । एउटा जिम्मेवार नागरिक हुनाका नाताले हामीले पनि युगजीवनका यथार्थ कटुसत्य र प्रभावको सामयिक विश्लेषण गर्नुपर्दछ । कोरोनाको प्रभावले विश्वव्यापी शैक्षिक गतिविधि ठप्प छ । त्यसैले यो परिस्थितिकीय समस्या हो । यस समयमा सरकारले विद्यालय खोले पनि समाजले स्वीकार गर्दैन । बरू अनलाइन पठन–पाठनलाई मान्यता दिनचाहिँ सरकारले ढिला गरेकै हो । तथापि अब त्यो पनि निर्णय भएको छ । शैक्षिक सत्र नाश हुन नदिने सरकारी निर्णय स्वागतयोग्य नै छ । शैक्षिक सत्र नै गायब हुने हो कि भन्ने सबैलाई चिन्ता अवश्य छ । तर, पाठ्यक्रम र पाठ्यभार घटाएर पनि शैक्षिक सत्रलाई अगाडि बढाउने पछिल्लो निर्णयले ती प्रश्नहरूको जवाफ दिएको छ । यो सबैका लागि खुसीको कुरा हो ।

हिसानले कक्षा ११ को भर्ना अभियानलाई तीव्र बनाइरहेको छ । अध्यापन चाहिँ कुन मोडलमा गर्ने सोचमा हुनुहुन्छ ?
–हिसान सुनसरीले आफ्ना सम्पूर्ण सदस्य विद्यालयहरूलाई भर्ना अभियान तीव्रताका साथ सञ्चालन गर्न आग्रह गरेका छौं । यसले शैक्षिक क्षेत्रमा गतिशीलता प्रदान गरेको छ । हामीले भदौ ५ गतेदेखि कक्षा १२ को कक्षा विद्युतीय प्रविधिका माध्यमबाट अनलाइन कक्षाहरू सञ्चालन गरिरहेका छौं भने असोज ५ गतेबाट कक्षा ११ को कक्षा सञ्चालन गर्ने तयारीमा छौं । हाल भौतिक रूपमा कक्षा सञ्चालन सम्भव नभएकोले हामी भर्चुअल कक्षालाई नै प्रयोग गर्छौं । यसबाहेक अन्य वैकल्पिक विधिहरूको पनि आवश्यकताका आधारमा प्रयोग गर्छौं तर, हाम्रो मुख्य प्राथमिकता अनलाइन विधि नै हुनेछ ।

अहिलेको विकल्प त अनलाइन नै होला, अनि यो अवस्थामा सबै विद्यार्थीको पहुँचमा अनलाइन शिक्षा छैन भनेर सरकारले नै विभिन्न आँकडा प्रक्षेपण गरिरहेको छ ? हिसानले कसरी सम्भव बनाउला ?
–हो, हाम्रो प्राथमिकता अनलाइन विधि नै हो । सुनसरी जिल्ला प्रविधिको उपलब्धताका हिसाबले सुगम छ । कतिपय समस्याहरू छन् । मोबाइल, ल्यापटप र इण्टरनेटका समस्याहरू आउन सक्छन् । हामी त्यसलाई गम्भीरताका साथ विश्लेषण गरिरहेका छौं । त्यसमा वैकल्पिक विकल्प खोजिन्छ नै । साथीसाथी शेयर गरेर पनि पढ्न सक्ने वातावरण बन्न सक्छ । सानो–सानो समूहमा विद्यालयमा बोलाएर सुरक्षित रूपमा प्रविधिले समस्यामा रहेका विद्यार्थीहरूलाई अध्यापन गराउन पनि सकिन्छ । हामीले आफ्ना विद्यार्थीहरूको जिम्मेवारी सहज पूरा गर्छौं र निर्धारित समयमा तोकिएको पाठ्यभार पूरा गर्नेछौं । जहाँसम्म सबै विद्यालय र क्षेत्रका विद्यार्थीको समस्या छ । त्यसमा बहुवैकल्पिक विधि प्रयोग होला । हामी मूलतः ती समस्याबाट मुक्त छौं ।

नेपाल सरकारले जारी गरेको वैकल्पिक सिकाइ सहजीकरण निर्देशिका–२०७७ को सिर्जनात्मक पक्षहरू कार्यान्वयन गर्न तीनै तहको सरकार चुकेको हो ?
–यसमा सङ्घीय, प्रादेशिक र स्थानीय सरकारले समस्यामा निर्णय नगरेकै कारण समस्या भएको हो । संस्थागत विद्यालय र सामुदायिक विद्यालयका मनोविज्ञानले पनि कतिपय समस्याहरू देखिएका हुन् । स्थानीय सरकारले शुल्क र पठन–पाठनका विषयमा स्पष्ट निर्देशन दिएनन् र अहिले पनि चुप छन् । यसरी बहुवैकल्पिक शिक्षाका विषयमा स्पष्ट व्याख्या पनि भएन । अझ लकडाउनको शृङ्खलाबद्ध र सिलसिलेवार प्रयोग मात्रले सधैँ त्रास र अन्यौल मात्र सिर्जना भयो । अब हामी आशा गरौं । सबै निकायले पाठ सिकेर अगाडि जाने बाटो खोल्नेछन् र विकल्पका विविध रूपको प्रयोगले हामी सफल हुनेछौं ।

शिक्षाको हकमा कोरोना चुनौती कि अवसर ?
–कोरोनाको प्रभावले अहिलेलाई चुनौती जस्तो देखिए पनि यो एउटा सुनौलो अवसर पनि हो । शिक्षण सिकाइमा यसले प्रविधिलाई प्रवेश गराएको छ । युगान्तकारी परिवर्तनका सङ्केतहरू देखिन थालेका छन् । परम्परागत शिक्षण विधि र आधुनिक विधिको अन्तरघुलन भएको छ र यसले समाजलाई नयाँ मार्गमा लैजानेछ । अब खोजमूलक, प्रदर्शनमूलक, परियोजनामुखी साँचो शिक्षण विधिको ढोका खोल्नेछ, जुन एक्काइसौं शताब्दीको अनुकूल हुनेछ । तसर्थ यो अवसर नै अवसरको हो भन्ने मलाई लाग्दछ । धन्यवाद ।

साढे तीन लाख रूपैयाँ ...

विराटनगर/अवैध रूपमा भारतबाट मध्य रातकाे समयमा तस्करी गर ...

पथरीशनिश्चरेमा कोरोन ...

पथरीशनिश्चरे । मोरङको पथरीशनिश्चरे नगरमा कोरोना भाइरस स ...

कोरोना संक्रमणको मात ...

विराटनगर । प्रदेश १ का सामाजिक विकास मन्त्री जीवन घिमिर ...

लागूऔषधविरुद्धको स्व ...

इनरुवा । लागूऔषध विरुद्ध सुनसरी प्रहरीले चालेको स्वीप अ ...

हाम्रो बारेमा

यो वेवसाइट ब्लाष्ट राष्ट्रिय दैनिकको आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सूचना प्रविधि, भिडियो तथा जीवनका विभिन्न आरोह अवरोहका समाचार र विश्लेषणलाई समेटिएको छ । तपाईको सूचनाको भोक मेट्न हामी निरन्तर सूचना प्रवाहमा जागा रहने छौ । राष्ट्रियता, लोकतन्त्र, नागरिक अधिकार, सुशासन र प्रेस स्वतन्त्रताका सवालमा राष्ट्रको पहरेदार भएर हामी लडिरहने छौ ।

सम्पर्क

  • धरान उपमहानगरपालिका-१५ पुष्पलाल मार्ग
  • फोन नं.: ०२५–५२५४५८
  • समाचार शाखाः ०२५–५३३४३५
  • बिज्ञापन शाखाः ०२५–०२५–५३३४१४
  • वेबसाइट: Blastkhabar.com
  • [email protected]

Copyright © 2016 / 2020 - Blastkhabar.com All rights reserved