।। १ ।।
म सुन्न सक्छु मुटुको प्रवेग
बुझेर तिम्रा क्षण एक एक
नजानिदो तन्मयता विशेष
बिरक्तिनु के ? क्षण हुन्न शेष ।।
।। २ ।।
छ राग कस्तो ? आनुराग जस्तो
परागले सिञ्चित बाग जस्तो ।
त्यस् बागका पुष्प लता विचार
झुमिरहेझैँ झन बार बार ।।
।। ३ ।।
यो सृष्टिको अन्तरमा रमाऊ !
यो सृष्टिभित्रै परमार्थ पाऊ ।
यो सृष्टि छाडी कहीँ जानु छैन
यै सृष्टिमा नाच यहीँ बिलाऊ ।।
।। ४ ।।
म सूर्यको विम्ब सरी फिजारूँ
विशेष मेरा शील शब्द चारू ।
म यै धरा धाम भरी रमेर
प्रभातमा झुल्किन पाउँ धेर।।
।। ५ ।।
म कोरुँ संश्लेषित शब्दचित्र
गरेर विश्लेषण भित्र भित्र
म भावनाका रहमा हराऊँ
हराई अन्तर मनभित्र पाऊँ ।।
।। ६ ।।
खुलेर हाँसे बुझ एक सास
म सुँघ्न सक्छु दिलको सुवास ।
नानाथरीका पीर जो हजार
फुकाउदै हाँस अनेक बार ।।
राताेपाटीबाट
