रसुवा । रसुवामा बुधबार बिहान भोटेकोशी नदीमा आएको अचानक ठूलो बाढीले टिमुरे, स्याफ्रुबेँसी तथा नेपाल–चीन सीमावर्ती क्षेत्र प्रभावित भएका छन्। बाढीले बस्ती तथा बजार क्षेत्रसँगै पुल, सडक, भन्सार परिसर र जलविद्युत् आयोजनाका संरचनामा क्षति पुर्याएको प्रारम्भिक विवरण छ।
स्थानीय प्रशासनका अनुसार बिहान करिब ९स्१५ बजेतिर नदीको बहाव अस्वाभाविक रूपमा बढेको थियो। बाढीको पानी तिब्बततर्फबाट आएको प्रारम्भिक जानकारी भए पनि यसको यकिन कारणबारे अध्ययन भइरहेको छ।
बाढीको तीव्र बहावका कारण टिमुरे बजार र भन्सार क्षेत्र प्रभावित भएका छन्। विभिन्न संरचना तथा सवारीसाधनमा क्षति पुगेको र पुलसमेत बगाएको प्रारम्भिक विवरण सार्वजनिक भएको छ। स्याफ्रुबेँसी क्षेत्र पनि बाढीबाट प्रभावित भएको छ।
भोटेकोशी आसपासका जलविद्युत् संरचनामा समेत असर परेको छ। चिलिमे जलविद्युत् आयोजना लगायतका आयोजनामा क्षति पुगेको प्रारम्भिक विवरण आएपछि विद्युत् उत्पादन तथा पूर्वाधारको अवस्थाबारे थप विवरण संकलन भइरहेको छ।
बाढीको कारणबारे प्रारम्भिक रूपमा माथिल्लो क्षेत्रमा हिमताल फुटेको हुनसक्ने आशंका गरिएको छ। नेपालतर्फ पछिल्लो २४ घण्टामा ठूलो वर्षा नभएकाले सामान्य वर्षाबाट मात्रै यति ठूलो बाढी आएको सम्भावना कम रहेको मौसमसम्बन्धी अधिकारीहरूले बताएका छन्। यद्यपि हिमताल फुटेको घटना भएको पुष्टि भने भइसकेको छैन।
भोटेकोशीको बाढीले त्रिशूली नदीतर्फ समेत प्रभाव पारेपछि नदीको तल्लो तटीय क्षेत्रमा जोखिम बढेको छ। रसुवासहित नुवाकोट, धादिङ, गोरखा र चितवनका नदी किनारमा बसोबास गर्ने नागरिकलाई सतर्क रहन आग्रह गरिएको छ।
बाढी प्रभावित क्षेत्रमा खोज तथा उद्धारका लागि नेपाली सेना, नेपाल प्रहरी र सशस्त्र प्रहरी परिचालन भएका छन्। उद्धार तथा राहतका लागि हेलिकप्टर र स्वास्थ्यकर्मीसहितका टोलीसमेत तयारी अवस्थामा राखिएको छ। बाढीपछि केही सुरक्षाकर्मी सम्पर्कविहीन रहेको र उनीहरूको खोजी भइरहेको प्रशासनले जनाएको छ।
यसैबीच, सम्भावित जोखिमलाई ध्यानमा राख्दै नदी किनार तथा प्रभावित सडकखण्डमा अनावश्यक आवतजावत नगर्न सर्वसाधारणलाई आग्रह गरिएको छ। प्रशासनले नदीको बहाव र जोखिमको अवस्था निरन्तर निगरानी गरिरहेको जनाएको छ।
बाढीबाट भएको मानवीय तथा भौतिक क्षतिको पूर्ण विवरण भने उद्धार तथा स्थलगत निरीक्षणपछि मात्र स्पष्ट हुने बताइएको छ। घटना विकसित भइरहेकाले क्षतिको विवरणमा थप परिवर्तन आउन सक्नेछ।
