बेरुत । दक्षिणी लेबनानमा इजरायली सेनाले गरेको हवाई आक्रमणमा कम्तीमा ११ जनाको मृत्यु भएको छ भने १९ जना घाइते भएका छन्। लेबनानको स्वास्थ्य मन्त्रालयका अनुसार शनिबार भएका छुट्टाछुट्टै आक्रमणमा तीन बालबालिका र दुई महिलासहित ११ जनाको मृत्यु भएको हो। जुन महिनामा इजरायल र हिजबुल्लाहबीच तनाव कम गर्ने सहमति भएपछि भएको यो सबैभन्दा घातक आक्रमणमध्ये एक भएको बताइएको छ।
इजरायली सेनाले दक्षिणी लेबनानमा हिजबुल्लाहसँग सम्बन्धित पूर्वाधारलाई लक्षित गरेर आक्रमण गरेको जनाएको छ। सेनाका अनुसार आफ्ना तीन सैनिक घाइते हुने गरी हिजबुल्लाहले आक्रमण गरेपछि त्यसको जवाफी कारबाहीस्वरूप दक्षिणी क्षेत्रमा हवाई हमला गरिएको हो। इजरायलले लक्षित क्षेत्रमा हिजबुल्लाहको सैन्य गतिविधि र भूमिगत संरचना रहेको दाबी गरेको छ।
लेबनानी अधिकारीहरूका अनुसार आक्रमणमा नागरिक बस्तीसमेत प्रभावित भएका छन्। दक्षिणी लेबनानको ८८अन्सार८८ र ८८देइर अल–जहरानी८८ क्षेत्रमा घरहरूलाई लक्षित गरी भएका आक्रमणमा सर्वसाधारणको ज्यान गएको उनीहरूको भनाइ छ। उद्धार टोलीले भग्नावशेषबाट मृतक तथा घाइतेलाई निकालेर अस्पताल पुर्याएको छ।
अन्सारमा भएको एउटा हवाई आक्रमणमा एउटै परिवारका सदस्यसहित सात जनाको मृत्यु भएको प्रारम्भिक विवरण सार्वजनिक भएको थियो। त्यसपछि अन्य क्षेत्रमा भएका आक्रमणबाट थप मानिसको मृत्यु भएपछि मृतकको संख्या ११ पुगेको लेबनानी स्वास्थ्य मन्त्रालयले जनाएको छ।
इजरायलले भने आक्रमणको मुख्य लक्ष्य हिजबुल्लाहका संरचना र कमान्डरहरू रहेको दाबी गरेको छ। इजरायली सेनाले हिजबुल्लाहले दक्षिणी क्षेत्रमा आफ्ना गतिविधि जारी राखेको र त्यसबाट इजरायली सैनिकमाथि खतरा बढेको जनाएको छ। सेनाले आक्रमणमा हिजबुल्लाहका एक कमान्डर मारिएको दाबीसमेत गरेको छ।
लेबनानका प्रधानमन्त्री नवाफ सलामले आक्रमणको निन्दा गर्दै सर्वसाधारण, विशेषगरी महिला र बालबालिकाको मृत्युले शान्ति प्रयासमा गम्भीर असर पार्ने बताएका छन्। राष्ट्रपति जोसेफ आउनले पनि पछिल्लो घटनाले इजरायल र लेबनानबीच जारी वार्ता तथा स्थिरता कायम गर्ने प्रयासलाई कमजोर पार्न सक्ने बताएका छन्।
पछिल्लो हिंसा अमेरिका–मध्यस्थतामा अघि बढिरहेको इजरायल–लेबनान शान्ति प्रक्रियाका लागि नयाँ चुनौती बनेको छ। जुन महिनामा भएको सहमतिले दक्षिणी लेबनानबाट इजरायली सेनाको चरणबद्ध फिर्ती र हिजबुल्लाहको सैन्य संरचना हटाउने विषयलाई जोडेको थियो। तर हिजबुल्लाहले निशस्त्रीकरणसम्बन्धी माग अस्वीकार गर्दै आएको छ।
आक्रमणपछि हिजबुल्लाहले उचित जवाफ दिने चेतावनी दिएको छ। यसले युद्धविराम कमजोर हुँदै पुनः व्यापक सैन्य द्वन्द्व सुरु हुन सक्ने चिन्ता बढाएको छ। पछिल्ला महिनाहरूमा दक्षिणी लेबनानमा पटक–पटक भएका आक्रमण र जवाफी कारबाहीले हजारौँ सर्वसाधारण प्रभावित भएका छन्।
जुन महिनापछि तुलनात्मक रूपमा शान्त देखिएको दक्षिणी लेबनानमा पुनः हिंसा बढ्नुले इजरायल र हिजबुल्लाहबीच दीर्घकालीन शान्ति कायम गर्ने प्रयास अझै अनिश्चित रहेको देखाएको छ। पछिल्लो आक्रमणपछि दुवै पक्षबीच तनाव थप बढ्ने र क्षेत्रीय रूपमा यसको असर फैलिन सक्ने आशंका गरिएको छ।
