बिर्तामोड । बिर्तामोड नगरपालिकाले फोहोरमैला विसर्जन गर्ने स्थलको व्यवस्थापन गरी अल्पकालीन समस्या समाधान गर्न कार्यदल गठन गरेको छ ।
नगरप्रमुख पवित्रा महतारा प्रसाईंको अध्यक्षतामा शुक्रबार बसेको कार्यपालिकाको बैठकले नगर उपप्रमुख नगेन्द्रप्रसाद सङ्ग्रौलाको संयोजकत्वमा कार्यदल गठन गरेको हो । समितिको सदस्यमा वडानम्बर ७ का वडाध्यक्ष कृष्णप्रसाद खरेल, वडानम्बर ८ का वडाध्यक्ष अजय कार्की र वडानम्बर १० का वडाध्यक्ष दुर्योधन गुरुङ रहेका छन् ।
बैठकमा बोल्दै नगरप्रमुख प्रसाईंले फोहोर व्यवस्थापनको समस्या विकराल हुनसक्ने भन्दै सबै एकजुट भएर व्यवस्थापनमा लाग्नु पर्ने बताइन् । बैठकले टोल विकास संस्थामार्फत् सबै घरधनी र व्यवसायीलाई कुहिने र नकुहिने फोहोर छुट्याएर राख्न र फोहोर सङ्कलन गर्ने गाडी आएपछि मात्र फोहोर बाहिर निकालेर दिन आग्रह गर्ने निर्णय पनि गरेको छ ।
बैठकले बिर्तामोड नगरपालिकाको शिक्षा ऐन जारी नभएसम्मका लागि शिक्षकहरूको अन्तरपालिका र अन्तरजिल्लाको सरुवा रोक्ने निर्णय गरेको छ । शिक्षा ऐनको मस्यौदा तयार भएर छलफलको क्रममा रहेको र साउनको अन्तिमसम्ममा छलफल सकेर कार्यपालिकामा पेश गर्ने गरी काम भइरहेको प्रमुख प्रशासकीय अधिकृत विनोदकुमार न्यौपानेले जानकारी दिए ।
यस्तै चालु आर्थिक वर्षबाट सञ्चालन गरिने नगरस्तरीय तथा वडास्तरीय योजनाहरू ३ चरणमा विभाजन गरी योजनाहरूको लागत स्टिमेट तयार गर्ने, सम्झौता गर्ने र सम्झौता भएका सबै योजनाहरूको अन्तिम फरफारक वैशाख मसान्तसम्ममा सम्पन्न गर्ने गरी कार्ययोजना बनाएर कार्यान्वयन गर्न कार्यालयलाई निर्देशन दिने बैठकले निर्णय गरेको छ ।
बैठकले नगरपालिकाको निर्णय र क्रियाकलापहरूलाई सार्वजनिकीकरण गर्न वडा नम्बर १ का वडाध्यक्ष अग्निप्रसाद पाण्डेलाई प्रवक्ता तोकेको छ । वडाध्यक्ष पाण्डे यसअघिको कार्यकालमा पनि नगरको प्रवक्ता रहेका थिए ।
