पार्टी कार्यालयमा धमाधम नयाँ साइनबोर्ड राख्दै नेकपा एमाले, ओली र माधव पक्षको हानाथाप

सर्वोच्च अदालतको निर्णयले नेकपा एमाले र नेकपा माओवादी केन्द्र नै यथावत् रहने अवस्था सिर्जना गरिदिएपछि साविकका आआफ्नै पार्टी कार्यालय स्थापना हुन थालेका छन् । 

सुनसरीको इनरुवास्थित नेकपाको पार्टी कार्यालयबाट माओवादी केन्द्र बाहिरिए पछि नेकपा एमालेको कार्यालय स्थापना भएको छ । 

सर्वोच्च अदालतको फैसलाबारे छलफल गर्न पेरिस डाँडामा बसेको प्रचण्ड माधव समूहको बैठकले साविक एमाले र साविक माओवादी केन्द्र अलग भएर जाने निर्णय गरेपछि यसको कार्यान्वयन जिल्ला तहमा पनि देखिएको छ । केन्द्रको फैसला नेकपाको सुनसरी जिल्ला नेतृत्वले सदर गरेको छ । 

फैसलाअनुसार माओवादी केन्द्रले साविक एमालेका सुनसरी अध्यक्ष रमेश बस्नेतलाई जिम्मेवारी सुम्पेर पार्टी कार्यालयबाट बिदा लिएको छ । सो पार्टी कार्यालय विगतमा नेकपा एमालेको कार्यालय रहेको थियो । 

नेकपा एमाले र नेकपा माओवादी केन्द्र २०७५ जेठ ३ गते एकीकरण भएर नेकपा गठन भएको थियो । सुनसरीमा २०७६ जेठ ६ गते जिल्ला कमिटी गठन भएपछि साविक एमालेको पार्टी कार्यालय नै नेकपाको भएको थियो । 

इटहरी एमाले स्थापना

राष्ट्रिय युवा संघ नेपाल इटहरी उपमहानगर कमिटीले इटहरी ६ स्थित पार्टी कार्यालयको बोर्ड परिवर्तन गरेको छ । पार्टी कार्यालयमा रहेको नेकपाको बोर्ड हटाएर युवाहरुले नेकपा(एमाले)को बोर्ड राखेका छन् । पार्टीको काम, कारबाही अबदेखि सोही कार्यालयबाट हुने पनि युवा संघले विज्ञप्तिमार्फत् जनाएको छ ।

संघका इटहरी अध्यक्ष कमल दाहालले विज्ञप्ती जारी गर्दै बोर्ड राख्ने, कार्यालय खोल्ने, राष्ट्रिय युवा संघ नेपालको नगर कार्यालयसमेत सञ्चालनमा ल्याइएको जानकारी दिए ।

धरान एमाले स्थापना

साविक नेकपा एमालेले धरानस्थित पार्टी कार्यालयमा नयाँ बोर्ड राखेको छ । 

अदालतको फैसला र नेकपाको अन्तिम बैठकको निर्णय पछि दुवै पक्षले आफ्नो पार्टीको संरचना निर्माणको काम सुरु गरेका छन् । 

एमालेले साविकको पार्टी कार्यालयमा आफ्नो साइनबोर्ड राख्ने अभियानको निरन्तरताअनुसार बोर्ड राखेको धरान एमालेले जनाएको छ । 

सोमबार साँझ बसेको प्रचण्ड माधव पक्षको स्थायी कमिटी बैठकले एकीकरण भएर नेकपा हुनुअघिकै साविक दुई पार्टीकोरुपमा अलग्गिने निर्णय गरेको थियो । 

प्रचण्ड पक्षले सर्वोच्च अदालतको फैसला अनुपयुक्त रहेको र यसप्रति गम्भीर असहमति हुँदाहुँदै पनि कार्यान्वयनको प्रक्रियामा जाने बताएको थियो । 

सर्वोच्चले आइतबार ऋषि कट्टेलको नेकपालाई अधिकारिता दिंदै सत्तारुढ दल नेकपा बदर गरिदिएको थियो । योसँगै अदालतले साविक एमाले र साविक माओवादी केन्द्र कायम रहने पनि फैसला सुनाएको थियो । 

नेकपामा रहँदा माधव नेपाल, झलनाथ खनाललगायत नेताहरु प्रचण्डको साथमा रहँदै पार्टी अध्यक्षबाट केपी शर्मा ओलीसहितका नेताहरुलाई साधारण सदस्यसमेत नरहने गरी कारबाही गरेको घोषणा गरेका थिए । अब नेपाल, खनाललगायत नेताहरुले एमालेभित्रै रहेर ओलीसँग संघर्ष गर्नुपर्ने स्थिति बनेको छ ।

साइनबोर्ड राख्न हानाथाप 

आजै (मंगलबार) बिहान माओवादी केन्द्रले साविक एमालेका सुनसरी अध्यक्ष रमेश बस्नेतलाई जिम्मेवारी सुम्पेर पार्टी कार्यालयबाट बिदा लिएको थियो । 

माओवादी केन्द्रले बिदा लिएपछि साविक नेकपाका अध्यक्ष रहेका रमेश बस्नेत (माधव नेपाल पक्ष) ले इनरुवास्थित पार्टी कार्यालयमा साइनबोर्ड राखेको थियो ।

तर प्रधानमन्त्री ओली पक्षका नेकपाका केन्द्रीय सदस्यसमेत रहेका जिल्ला अध्यक्ष रेवतीरमण भण्डारीले उक्त साइनबोर्ड हटाएर आफूले नेकपा एमालेको नयाँ साइनबोर्ड राखेको छ ।  

विगतमा नेकपा एमालेको कार्यालय रहेको थियो । रमेश बस्नेत माधव प्रचण्ड गुटमा लागेपछि नेकपा ओली पक्षका अध्यक्ष रेवतीरमण भण्डारी चयन भएका थिए ।