इनरुवा/ सुनसरीमा नेपाल प्रहरी र अपराधिक समूहबीच गोली हानाहान भएको छ । बिहीबार राति पौने ९ बजेको समयमा जिल्लाको देवानगञ्ज गाउँपालीका वार्ड नम्बर ३ स्थित देवानगञ्जमा नेपाल प्रहरी र अपराधिक समूहबीच गोली हानाहान भएको सुनसरी प्रहरीले जनाएको छ ।
सुनसरी प्रहरीको नियमित गस्ती अन्तर्गत सर्च अप्रेसनको क्रममा गस्तीमा रहेको प्रहरी टोली र अपराधिक समूहबीच गोली हानाहान हुँदा दुईजना घाइते भएका छन् । सुनसरी प्रहरीले दिएको जानकारीअनुसार जिल्लाको देवानगञ्ज गाउँपालीका वार्ड नम्बर ३ मा रातीको समयमा शंकास्पद देखिएपछि ४-५ जनाको संख्यामा रहेका युवालाई सर्च गर्दा दुबै पक्षबीच गोली हानाहान भएको थियो ।
हतियार खोसाखोस गर्ने क्रममा एक थान पेस्तोल, केही राउण्ड गोली र २ थान म्यागेजिन समेत बरामद भएको सुनसरी प्रहरीले जनाएको छ । दुबै तर्फको फाइरिङ हुँदा करिब १०-१२ राउण्ड गोली चलेको प्रहरीको भनाई छ ।
दोहोरो फाइरिङ हुँदा दुई जनालाई गोली लागेको र उनीहरूलाई प्रहरीले नियन्त्रणमा लिन सफल भएको जिल्ला प्रहरी कार्यालय सुनसरीका एसपी कमल थापाले जानकारी दिए । पक्राउ पर्नेहरूमा राजेश र पिन्टु भन्ने व्यक्ति रहेका छन् । उनीहरु दुबैलाई खुट्टामा गोली लागेको छ ।
दुवै जनालाई उपचारका लागि अस्पताल लगिएको बताइएको छ । उनीहरू साथै रहेका अन्य भने दशगजा क्षेत्र हुँदै फरार भएको एसपी थापाले जानकारी दिए । घटनास्थलबाट प्रहरीले दुई थान मोटरसाइकल समेत बरामद गरेको छ भने यसबारे थप अनुसन्धान थालिएको सुनसरी प्रहरीको भनाइ छ ।
