झापा/ झापाली गायिका निशु ढकालले नेपालीहरुको महान् चाड विजयादशमी (दशैं) को अवसर पारेर दशैं गीत सार्वजनिक गरेकी छन् ।
‘यो रमाइलो दशैं आयो’ बोलको गीत उनले सार्वजनिक गरेकी हुन् । गीतमा शब्द, संगीत तथा एरेन्ज नविन के. तिमल्सिनाको रहेको छ ।
गीतको भिडियो सुनिल शाहीले खिचेका हुन् । दशैंको अवसरमा सार्वजनिक यस गीत लाखौं नेपालीले मन पराउनेमा गायिका निशु विश्वस्त छिन् ।
‘दशैं हरेक नेपालीको लागि निकै महत्वपूर्ण चाड हो’, निशुले भनिन् ‘गीतको शब्द, संगीत निकै राम्रो छ, त्यसकारण यस गीतलाई दर्शक, श्रोताले मन पराउनुहुन्छ भन्नेमा म विश्वस्त छु ।’
संगीतमा भविष्य खोज्दै गायिका निशु विगत केही वर्षदेखि सांगीतिक यात्रामा निरन्तर क्रियाशील रहेकी छन् । यसभन्दा अघि पनि उनका गीत लोकप्रिय भइसकेका छन् ।
आगामी दिनमा दर्शक श्रोताको चाहना अनुसार गीत सार्वजनिक गर्ने उनको योजना छ ।
झापा बुद्धशान्ति ३ मा जन्मिएकी निशु सांगितिक यात्रालाई निरन्तरता दिन यतिवेला काठमाडौंमा प्रयासरत छिन् ।
https://www.youtube.com/watch?v=PKMK1nkViws
