‘म पागल हुँ, पागल भनिदेऊ म जे हुँ त्यही भनिदेऊ....’, ‘कुन सहरमा घुम्दै होला मलाई छुने मन..., ‘मन त तिम्रो पत्थरको भित्ता भो...’, तिम्रोजस्तो चोखो माया अन्त कहीं पाइँदैन..., ‘भेटे तिमीलाई त्यो पलमा अन्जान थिए म जुनबेला...’ लगायतका दर्जनौं कर्णप्रिय र कालजयी गीतमा सुमधुर आवाज भरेका लेखु विवश आज भोलि कुन सहरमा घुम्दै होलान् ?
उनका गीत मनपराउनेहरुको साझा प्रश्न हो यो । कुनै बेला सांगीतिक आकाशका हस्ती राजेश पायल राईलाई समेत उछिनेर रेडियो नेपालको प्रतियोगितामा उत्कृष्ट बनेका लेखु विवश आज उनैको आवाजमा सजिएको गीतको बोल जस्तै – कुन सहरमा घुम्दै होला ? भन्ने प्रश्न गरिरहनु परेको छ । जसले कुनै बेला लामो समयसम्म स्रोताको मन छोएको थियो । र, आज पनि उसैगरी कर्णप्रिय छ ।
‘बगिजाने खोला रैछ, बग्यो जिन्दगानी
जति हिंड्यो लेखिंदैछ दुखिया कहानी’
‘दुःखकै गीतहरु शक्तिशाली हुँदा रहेछन्,’ लेखु भन्छन्,‘ दुःखकै गीतहरु भन्दा मीठो संसारमा केही नहुने रहेछ ।’
गीतहरु पनि दुःखकै गाए । आफ्नो जीवन पनि उनले दुःखपूर्ण नै पाए । यम बरालको स्वरमा रहेको ‘बादलुको घुम्टोले इलाम बजार छोपिंदा...’ गीत खास लेखुका लागि लेखिएको थियो । ज्ञानेन्द्र गदालको शब्द र बुद्धवीर लामाको संगीतमा । तर यम बरालले गीत गाइसकेपछि लेखुमा खिन्नता छाएछ । उनी हतोत्साहित भएछन् । यो देखेर गीतकार गदालले लेखिदिए अर्को मधुर गीत– ‘कुन सहरमा घुम्दै होला मलाई छुने मन... । जसलाई बुलु मुकारुङले संगीत गरिदिए । लेखुलाई लेखु विवशका रुपमा चिनायो यो गीतले । र कालजयी बन्यो ।
लेखु विवशले ०४७ सालमा स्वरपरीक्षा पास गरेर रेडियो नेपालमा पहिलो पटक गीतकार डम्बर पहाडीको शब्द, संगीतमा रहेको गीत ‘म पागल हुँ, पागल भनिदेऊ म जे हुँ त्यही भनिदेऊ....’ रेकर्ड गराए । पछि रेडियो नेपालद्वारा आयोजित प्रतियोगितामा गीतकार ज्ञानेन्द्र गदाल र बुलु मुकारुङको संगीतमा रहेको ‘कुन सहरमा घुम्दै होला मलाई छुने मन..., बोलको गीत गाए । प्रतियोगितामा उनी तेस्रो भए । पहिलो रिमा गुरुङ, दोस्रो सुरेश अधिकारी र उनी तेस्रो । सान्त्वना भने राजेश पायल राई भए । उनले गाएको गीत प्रतियोगितामा शब्द, संगीतमा पहिलो भएको थियो ।
‘कहाँ होला ढकमक प्रिती फुल्ने वन
जहाँजहाँ जान्छु त्यहीं लाग्छ नयाँपन’
गीतजस्तै लेखु विवश नयाँ ठाउँमा रोजगारी खोज्दै हिंडे । फिक्कल, धनकुटा, धरान, काठमाडौं, फेरि फिक्कल र अहिले पुनः धरानमा आएका छन् ।
‘थाहा छैन अन्त्य यसको यात्रा चलेकै छ
निभाउ भन्छु हृदयमा आगो बलेकै छ’
धरानमा रहेर अब लेखुले हृदयका आगो निभाउने प्रयत्न गर्ने छन् । ‘कुन सहर ...’ पछि उनको सांगीतिक जीवनमा टर्निङ प्वाइन्ट रहेको गीत ‘मन त तिम्रो पत्थरको भित्ता भो...,’ देशका एफएम रेडियोहरुले अत्यधिक रुपमा बजाएका थिए यो गीत । त्यही गीतका रचनाकार पर्वत सञ्जेलको सहयोगमा लेखु धरानमा रहेका छन् । उनले धरानमै रहेर केही प्रोजेक्ट गर्ने छन् । उनीसँग संगीतकार विकास राई छन् ।
लेखु विवशका गीतसंगीतको आरोह–अवरोह र नयाँ योजनाका बारेमा गरिएको कुराकानी भिडियोमा प्रस्तुत गरिएको छ ।
लेखु विवश बारे थप जानकारी यहाँ क्लिक गर्नुहोस् ।
