विराटनगर / विराटनगर महानगरपालिकाले वडा नं. १६ दरैयास्थित स्वास्थ्य केन्द्र स्थापना गरेको छ । भारतको सिमा जोडिएको वडामा महानगरपालिकाले स्वास्थ्य केन्द्र स्थापना गरेको हो ।
स्थानियमा स्वास्थ्य सेवाको पँहुच बढाउने उद्देश्यले स्वास्थ्य केन्द्र स्थापना गरेको विराटनगर महानगरपालिका प्रमुख भीम पराजुलीले जानकारी दिए ।
स्वास्थ्यचौकीको बुधवार एक अनौपचारिक कार्यक्रमका वीच विराटनगर महानगरका प्रमुख पराजुलीले उद्घाटन गरेका छन् । नगरका हरेक क्षेत्रमा स्वास्थ्य सेवा उपलब्ध गराउने उदेश्यका साथ महानगरले काम गरिरहेको उनले बताए । कोरोनाका कारण सामान्य जाँच गर्न समेत कठिनाइ भइरहेको अबस्थालाई मध्यनजर गर्दै महानगरले काम गरिरहेको पराजुलीले बताए ।
यस्तै विराटनगर १६ का वडाध्यक्ष मनोज सुव्वाले जटिल परिस्थितीमा स्थापना भएको स्वास्थ्य केन्द्रबाट वडावासी खुसी भएको बताए । यसका लागि थप स्वास्थ्य परीक्षणका दायर बढाउन सुव्वाले महानगरपालिकासँग आग्रह गरे । स्वास्थ्य केन्द्रबाट स्थानीयस्तरमा उत्कृष्ट सेवा प्रवाह गर्ने गरी थप गृहकार्य भइरहेको विराटनगर महानगर स्वास्थ्य महाशाखा प्रमुख रमेश कार्कीले जानकारी दिए । महानगरले यसभन्दा अगाडी वडा नं.४ को इक्राइ चोकमा आधारभूत स्वास्थ्य केन्द्र स्थापना गरेको छ ।
स्वास्थ्य केन्द्र नहुदा बिशेष गरी बृद्धवृद्धा,गर्भवती र बालबालिकाहरुले समस्या बेहोरिरहेका थिए । एक जना डाक्टर र नर्स रहने गरी स्वास्थ्य केन्द्र स्थापना भए संगै स्थानीयहरुले खुसी व्यक्त गरेका छन् ।
