देउराली । धनकुटा नगरपालिका ४ दानाबारी टोलमा आगलागी हुँदा करिब ६ लाख बारबारको क्षति भएको छ ।
आइतबार बिहान स्थानीय लीलाबहादुर आचार्यको घरमा भएको आगलागीमा आचार्य र उनकी श्रीमती कमला सामान्य घाइते भएका छन् । घरको भान्सा काेठामा खाना पकाउने नयाँ ग्यासको सिलिन्डर फेर्ने क्रममा रेगुलेटरबाट ग्यास चुहावट भएपछि आगलागी भएको वडाध्यक्ष जम्सेर राईले बताए ।
उनका अनुसार आगोको रापले भेटेर घाइते भएका श्रीमान् श्रीमती जिल्ला अस्पतालमा उपचार गरिएको छ । आगलागीबाट कोठामा रहेका खाद्यान्न तथा लत्ताकपडा जलेर नष्ट हुनुका साथै घरसङ्गै जोडिएको कुखुरा फार्ममा रहेका २ सय वटा कुखुराको चल्ला समेत मरेका छन् । बिहान करिब साढे ९ बजे भएको आगलागी स्थानीय, नेपाल प्रहरी, सशस्त्र प्रहरी, नेपाली सेनाको मद्दतमा नियन्त्रण गरिएको राईले बताए ।
आगलागीबाट ६ लाख ३० हजार बराबरको क्षति पुगेको बताइएको छ ।
