धरान । कृषि उपज बजार स्थलमा भण्डारण गर्ने भनेर लगिएको बोलेरो जिपको खरबुजा आफ्नै गोदाममा भण्डारण गरेको पाइएपछि धरान उपमहानगरको अनुगमन समितिले कारबाही गरेको छ ।
मे १ च ४७३३ नम्बर बोलेरो जिपमा तराई क्षेत्रबाट ल्याइएको एक गाडी खरबुजा गोपाल राउतले आफ्नै गोदाममा भण्डारण गरेको पाइएपछि कारबाही गरिएको हो । राउत र उनका भाइ रामदुलाम राउतले तराई क्षेत्रबाट एक गाडी खरबुजा सोमबार राति ल्याएका थिए । तर, कृषि उपज बजार स्थलमा भण्डारण गर्ने भनेपछि अनुगमन समितिले छाडेको थियो । तर, छड्के जाँच गर्दा धरान–३ स्थित पुरानो बजारमा आफ्नै गोदाममा भण्डारण गरिरहेको पाइएपछि कारबाही गरिएको अनुगमन अधिकृत वेदप्रकाश सापकोटाले जानकारी दिए ।
उनलाई कारबाही स्वरूप एक हजार रुपैयाँ जरिवाना गरिएको छ । र, सामग्री कृषि उपज बजार स्थलमा लगेर भण्डारण गर्न निर्देशन दिइएको अधिकृत सापकोटाले जानकारी दिए । सोमबार साँझ अनुगमन समितिले धरान–८ को धरान नाका तीनकुने पोष्टमा जाँच गरेका थिए । जसक्रममा ८ वटा गाडीहरू धरान आएका थिए । प्रक्रिया पु¥याएर आए पनि धरान प्रवेशको अनुमति नलिएको पाइएपछि अन्य सात वटा गाडीलाई प्रथम पटक चेतावनी दिएर छाडिएको छ । जसमा तीन वटा आलुका गाडी रहेका थिए । ‘पुनः गल्ती नदोहोर्याउने शर्तमा अन्य सातवटालाई छाडिएको छ’ उनले भने, ‘यसले चाहिँ कृषि उपजमा भण्डारी गर्ने भनेर आफ्नै गोदाममा भण्डारण गरेको पाइएपछि कारबाही गरिएको हो ।’
अनुगमन समितिले कृषि उपज बजार स्थलमा मात्रै भण्डारण गर्न पाउने एकद्वार नीति बनाएको छ । अन्यत्र भण्डारण गरेको पाइए कारबाही गरिने भएको छ । र, कृषि बजारबाट मात्रै अन्यत्र बिक्रीका लागि लान पाउने व्यवस्था गरेको छ । खुद्रामा पनि बजारले तोकेको न्यूनतम मूल्यभन्दा बढीमा बिक्री गरे कालोबजारी ऐन अन्तर्गत कारबाही गरिने भएको छ । सोमबार धरान–१६ का सन्तोष साहलाई ५ हजार रुपैयाँ जरिवाना गरिएको थियो । करिब डेढ सय केजी सब्जी बरामद गरिएको थियो । बरामद गरिएको सब्जी भने फिर्ता गरिएको छ ।
