काठमाडौं/कलाकार दीपकराज गिरीले नायिका ऋचा शर्माको चलचित्र ‘सुनकेशरी’ को प्रचार गरेका छन् । दीपकले आइतबार शर्माको मुख्य भूमिका रहेको हरर सिनेमा ‘सुनकेशरी’ को युट्युबमा राखिएको ट्रेलर सामाजिक सञ्जाल फेसबुकमा सेयर गरेसँग नायिका प्रियंका कार्कीले पनि ‘सुनकेशरी’ को ट्रेलर सेयर गरेकी छन् ।
पछिल्लो समय फिल्म ‘छक्का पञ्जा’मा बोलीएको डाईलग र त्यसले महिलामाथि विभेद गरिएको, हिंसा गरिएको भन्दै ऋचा शर्माले फिल्मको आलोचना गरेकी थिईन् त्यस लगत्तै ‘छक्का पञ्जा’ फिल्मका दीपकराज गिरी, दीपाश्री निरौला, प्रियंका कार्की लगायत पुरै युनीट ऋचा शर्माको बिरुद्ध ओर्लीएका थिए ।
यद्यपी ती बिगतका कुरालाई बिर्सेर हालै दीपकराजले ‘सुनकेशरी’ को ट्रेलर सेयर गरे र लेखेका छन्, ‘सबै प्रकारको फिल्म बन्नु पर्छ । सबै प्रकारको नेपाली फिल्म चल्नु पर्छ । आफ्नो फिल्म चल्दा मात्रै होइन, अरूको फिल्ममा पनि ताली बज्नुपर्छ । ऋचा शर्माको ‘सुनकेशरी’ ट्रेलर !!!’
दीपक र प्रियंकाको यो कार्यलाई विगतमा भएको तिक्तता मेटाउने प्रयास सहितको सकारात्मक सन्देश भन्दै विश्लेषण गरिएको छ ।निर्देशक अर्पण थापाले एक करोड भन्दा बढी लागतमा तयार गरेको चलचित्र ‘सुनकेशरी’ मा ऋचाले पहिलोपल्ट भूत भएर अभिनय गरेकी छन् ।
