विराटनगर । विराटनगर महानगरपालिकामा विगत पाँच दिनदेखि देखिएको फोहर व्यवस्थापनको समस्या तत्कालका लागि समाधान भएको छ । ल्यान्डफिल साइट (फोहर विसर्जन केन्द्र) स्थानान्तरणको विषयमा छिमेकी सुनसरीको बर्जु गाउँपालिकाका बासिन्दा र महानगरबीच उत्पन्न विवाद बिहीबार भएको ७ बुँदे सहमतिसँगै टुङ्गिएको हो ।
महानगरले एक दशकदेखि विराटनगर–६ ब्रह्मपुरामा फोहर विसर्जन गर्दै आएकोमा पुस १ गतेदेखि वडा नम्बर १६ दरैयास्थित आफ्नै जग्गामा फोहर व्यवस्थापन सुरु गरेको थियो । तर, त्यहाँ फोहर फाल्दा दुर्गन्ध फैलिने र केसलिया खोला प्रदूषित भई स्वास्थ्यमा असर पर्ने भन्दै बर्जु–२ का बासिन्दाले अवरोध गरेका थिए । स्थानीयको अवरोधका कारण पाँच दिनदेखि विराटनगरको फोहर संकलन हुन सकेको थिएन ।
विवाद समाधानका लागि जिल्ला प्रशासन कार्यालय मोरङमा भएको वार्तामा फोहर व्यवस्थापनलाई व्यवस्थित बनाउने सहमति भएको हो । सहमतिका बुँदामा फोहरको दुर्गन्ध रोक्न दैनिक केमिकल प्रयोग गर्ने, फोहरलाई माटोले पुर्ने, विसर्जन केन्द्रसम्म पुग्ने सडक स्तरोन्नति गर्ने, फोहर बोक्ने गाडीलाई अनिवार्य त्रिपालले छोप्ने र केसलिया खोलामा फोहर मिसिन नदिन तटबन्ध निर्माण गर्ने उल्लेख छ ।
सहमति कार्यान्वयनको अनुगमन गर्न विराटनगर–१६ का वडाध्यक्ष उद्धवकुमार भुजेलको संयोजकत्वमा बर्जु गाउँपालिकाका प्रतिनिधिसहितको समिति गठन गरिएको छ । साथै, एसियाली विकास बैंकको सहयोगमा व्यवस्थित फोहर विसर्जन केन्द्र निर्माणका लागि पहल गर्ने विषयमा पनि सहमति भएको छ ।
सहमति भएसँगै बिहीबार रातबाट विराटनगरको दैनिक करिब १०५ मेट्रिक टन फोहर संकलन तथा विसर्जनको काम पुनः सुरु भएको महानगरले जनाएको छ । यद्यपि, स्थानीय बासिन्दाले सहमति कार्यान्वयन नभए पुनः आन्दोलनमा उत्रने चेतावनी दिएका छन् ।
