विराटनगर । शनिबार भएको नेकपा (एमाले) को ११ औं महाधिवेशन प्रतिनिधि छनौटका क्रममा विराटनगर र धनकुटामा दुई पक्षबीच विवाद भएको छ ।
विराटनगरको पाञ्चालीस्थित पार्टी कार्यालयमा शनिबार दिउँसो महाधिवेशन प्रतिनिधि छनौटको क्रममा विवाद हुँदा संस्थापन र इतर पक्षबीच धकेलाधकेल भएको छ ।
धकेलाधकेलका क्रममा विराटनगर महानगरपालिका कमिटीका इन्चार्जसमेत रहेका संस्थापन पक्षका पर्शुराम बस्नेतमाथि हातपातको प्रयास भएको छ । सामाजिक सञ्जालमा आएको भिडियोको पृष्ठभूमिमा एक महिलाले ‘आफू–आफू लडाइँ गरेर मर्ने भए’ भन्दै चिन्ता व्यक्त गरेको सुनिन्छ भने कार्यकर्ताहरूबीच ठेलमठेल चलिरहेको देखिन्छ । यो घटनाले एमालेको आन्तरिक प्रतिस्पर्धामा देखिएको तीव्र गुटबन्दी र असन्तुष्टिलाई सतहमा ल्याएको छ ।
मतदान भइरहँदा संस्थापन इतर विनोद ढकाल पक्षले एउटै व्यक्तिलाई धेरै पटक वारेस बनाएको भनेर विरोध गरेको बताइएको छ । त्यस निहुँमा केहीबेर तनाव भएपछि स्थिति धकेलाधकेलसम्म पुगेको थियो । विवाद भएपछि केहीबेर मतदान पनि रोकिएको थियो ।
केहीबेरपछि स्थिति सामान्य बनेसँगै मतदान सुरु भएको थियो । घटनापछि सञ्चारकर्मीहरूसँग कुरा गर्दै नेता बस्नेतले बाहिर चर्चा भएजस्तो र भिडियोमा देखिएजस्तो हातपात नभएको दाबी गरेका छन् । भिडियोमा बस्नेत आक्रोशित मुद्रामा अघि बढेको र धकेलाधकेल भएको देखिन्छ, तर उनले त्यसलाई अस्वीकार गरे ।
नेता बस्नेतले भीडभाडमा फर्किने क्रममा खुट्टा अल्झिएर लड्न खोज्दा हातपात गरेजस्तो देखिएको जिकिर गरे । उनले भने, ‘‘भिडियोमा धकेलेको होइन । म यसो फर्किदाखेरी त्यो भीडमा खुट्टा अल्झिएर यसो लडेजस्तो देखिएको हो । कसैले कसैलाई हातपात गर्ने कुरा भएको छैन । सामान्य छलफल मात्र भएको हो । छलफल चाहिँ अलि चर्काचर्की नै भएको हो, तर कुटपिटको तहमा पुगेको छैन ।”
बस्नेतका अनुसार मतदान प्रक्रियामा नियम विपरीत एकै व्यक्तिले धेरै जनाको भोट हाल्न खोजेपछि विवाद सुरु भएको थियो । आँखा नदेख्ने र अशक्तका नाममा ‘इच्छाइएको व्यक्ति’ भन्दै एकजना कार्यकर्ताले २० औं पटक मतदान गर्न खोजेपछि आफूले रोकेको उनले बताए ।
‘‘अशक्तका लागि परिवारको सदस्य वा तोकिएको व्यक्तिले भोट हाल्न पाउँछ, तर एउटै नेता–कार्यकर्ताले २० पटक भोट हाल्न खोजेपछि मैले यो गलत हो, तपाईं बाहिर जानुस् भनेर रोकेको हुँ” बस्नेतले भने, ‘‘जिम्मेवार मान्छेले नै विधि मिच्न खोजेपछि सम्झाउने क्रममा ठूलो स्वर भएको हो ।”
घटनालाई राजनीतिक रङ दिँदै बस्नेतले पार्टीभित्र र बाहिर अध्यक्ष केपी शर्मा ओली पक्षलाई घेराबन्दी गर्न खोजिएको गुनासोसमेत गरे । उनले ओली पक्षधर भएकै कारण आफूहरूलाई पेल्न, हेप्न र विधि मिच्न खोजिएको र त्यसको प्रतिवाद गर्दा घटना भएको बताए ।
यता महाधिवेशन प्रतिनिधि चयनमा एकलौटी गरिएको भन्दै धनकुटामा असन्तुष्ट समूहले निर्वाचन बहिस्कार गरेका छन् । बहिस्कार गर्नुअघि केही निर्वाचन बुथमा असन्तुष्ट समूहले तोडफोडसमेत गरेका छन् । एमालेको महाधिवेशनमा प्रतिनिधि छनौट सर्वसम्मत नभएका ठाउँमा शनिबार देशभरि निर्वाचन भएको छ ।
धनकुटामा राजेन्द्र राई र इन्द्रमणि पराजुली पक्ष गरेर २ वटा समूह भएको थियो । इन्द्रमणि समूहले मतदातालाई थाहा नै नदिई एकलौटी हिसाबले निर्वाचन गराएको आरोप लगाएको छ । पराजुलीले राई पक्षले आफूहरूलाई थाहा नदिई एकलौटी आफू निकटका निर्वाचन अधिकृत तोकेको आरोप लगाए ।
उनले भने, “पार्टी कार्यालय निर्वाचन केन्द्रमा फर्जी मत हालेको भेटिएपछि विरोधस्वरूप मतपेटिका फालिएको छ । हामीले तालाबन्दीसमेत गरेका छौँ ।”
धनकुटामा लामो समयदेखि राजेन्द्र राई पक्षधरको वर्चस्व रहँदै आएको छ । धनकुटामा शुक्रबार साँझ ९ र ४ को सहमति भएको पराजुलीले बताए । उनका अनुसार ९ जना राई पक्षबाट र ४ जना इतर समूहबाट प्रतिनिधि पठाउने सहमति भएको थियो । सहमतिअनुसार ४ जना बाहेकले मनोनयन फिर्ता लिएपछि निर्वाचन भएको हो ।
यता सुनसरीका अधिकांश क्षेत्रमा निर्वाचन भएको छ । बिहीबार र शुक्रबार सहमतिका लागि छलफल भए पनि सहमति हुन नसकेपछि शनिबार निर्वाचन भएको हो । सुनसरी क्षेत्र नं. १ मा युवा प्रतिनिधि छनौटको छलफलमा बिहीबार विवाद हुँदा रामधुनीका अनिल राजधामी कुटिएका छन् । जिल्ला सदस्यसमेत रहेका राजधामीलाई एमाले धरान नगर उपसचिव दिवस बान्तवाले कुटेको बताइएको छ ।
कोशी प्रदेशको भोजपुर, ताप्लेजुङ, सोलुखुम्बु, पाँचथर, तेह्रथुम, सङ्खुवासभा, इलाम र खोटाङमा सर्वसम्मत भएको नेकपा (एमाले) कोशी प्रदेश इञ्चार्ज शेरधन राईले जानकारी दिए । झापा, मोरङ, सुनसरी, धनकुटा, उदयपुर र ओखलढुङ्गामा भने निर्वाचनको माध्यमबाट प्रतिनिधि छनौट गरिएको उनले बताए ।
यता छिटफुट रूपमा रोकिएको प्रतिनिधि छनौट प्रक्रिया पनि निर्वाचनबाट टुङ्ग्याउने निर्देशन दिएको नेकपा (एमाले) पार्टी महासचिव शङ्कर पोखरेलले जानकारी दिएका छन् । उनका अनुसार एक प्रतिनिधि निर्वाचन क्षेत्रबाट खुला, महिला र युवा गरी चार जना प्रतिनिधि छनौट हुनेछन् । शनिबार छनौट भएका प्रतिनिधि विवरण यही मङ्सिर १५ गतेभित्र पार्टी केन्द्रीय कार्यालयमा पठाइसक्न एमालेले निर्देशन दिएको छ । एमालेले यही मङ्सिर २७ देखि २९ गतेसम्म भक्तपुरमा महाधिवेशन हुने जनाएको छ । अध्यक्षमा केपी ओली र वरिष्ठ उपाध्यक्ष रहेका ईश्वर पोखरेलबीच कडा प्रतिस्पर्धा हुने बताइएको छ ।
