धरान / “ए हजुर, नमस्कार १ हात मिलाउने हैन, शिष्टतापूर्वक नमस्कार गरौँ ।” सुनसरीको धरान उपमहानगरपालिका– ७ नं. वडा अध्यक्ष जीवन सुवेदी घर घर नमस्कार गदैं हिड्दैं थिए । यो सन्देश फैलाउन अखिल नेपाल महिला संघ(अनेमासंघ) ७ नं. वडाले अहिले अभियान नै शुरु गरेको छ । वडाका स्थानीयहरुलाई सचेतनाका लागि उपमेयर मञ्जु भण्डारी आफै पुगेर सन्देश फैलाएकीछन् । अनेमासंघकी सुनसरी कार्यवहाक अध्यक्ष बेणु काफ्लेसहित चोकचोकमा सन्देश बाढ्दै हिडेको विहीबार भेटियो । ४ वटा समुह बनाएर ३÷४ जनाको समुहले हात मिलाउनुको सट्टा नमस्कार गर्न र याे बर्षको होली नखेल्न स्थानीयलाई सन्देश दिएको काफ्लेले जानकारी दिइन ।
सधै हात मिलाएर बोलचाल गरी हात मिलाउने आज वडा अध्यक्ष सुवेदी सबैलाई हात हल्लाउदैं नमस्कार गदैं हिडे । ‘सचेतता नै कोरोना भित्रिन नदिने एकमात्र उपाय हो, त्यसैले इष्टमित्र साथीभाइ भेट हुँदा हात मिलाउने हैन, दुवै हात जोडेर विनम्रतापूर्वक नमस्कार गरौँ ।’–सुवेदीले भने ।
‘हात मिलाउने हैन, नमस्कार गरौँ नमस्कार’ अभियान प्रत्येक वडामा वडाध्यक्षको नेतृत्वमा थालिने उपप्रमुख मञ्जु भण्डारीले बताइन । अभियानमा कोरोना सङ्क्रमणबाट बच्ने उपायबारेको हातेपर्चा समेत बाढिएको छ ।
कोरोना भाइरसबाट बच्ने उपाय
कोरोना भाइरसबाट बच्न सर्जिकल मास्क अनिवार्य लगाउन, हात नमिलाई नमस्कारको अभिवादन मात्र गर्न, पटकपटक पानी खाइराख्न, नाक, मुख, घाँटी छिनछिनमा पखाली रहन, समूहमा नबस्न र राम्ररी पाकेको खानेकुरा खान अपिल गरिएको छ । हातेपर्चामै रुघाखोकी लागेका व्यक्तिको संसर्गमा नरहन, भिडभाड हुने कार्यक्रम आयोजन नगर्न, यस्ता कार्यक्रममा सरिक नहुन र यसबारे शङ्का लाग्नबित्तिकै नजिकको स्वास्थ्य संस्थामा जाँच गर्न गइहाल्न अपिल पनि गरिएको छ ।
