गएको वर्ष रिलिज भएको फिल्म 'लप्पन छप्पन'मा एकसाथ काम गरेका नायक सौगात मल्ल र अर्पण थापालाई पर्दामा एकपटक फेरि दर्शकहरुले हेर्न पाउने भएका छन् । हुनत, योभन्दा अगाडि पनि सौगात र अर्पणले 'बधशाला', 'मुखौटा', 'लप्पन छप्पन', 'छड्के', र 'निभ्न लागेको दियो'मा काम गरेका थिए ।
यो छैटौं पटक हुँदैछ सौगात र अर्पण एकसाथ काम गर्दैछन् । 'लप्पन छप्पन' फेम निर्देशक मुकुन्द भट्टले यी दुईलाई मुख्य भूमिकामा अनुवन्धित गर्दै 'जोजो' नामक फिल्म निर्माण गर्न लागेका हुन् ।
एक्सन रिभेन्ज फिल्म 'जोजो'का लागि अर्पण थापा, सौगात मल्ल, देबु लामा र नविन शाह अनुवन्धित भएको निर्देशक भट्टले जानकारी दिए । चिजकुमार प्रोडक्सन, देबु श्रेष्ठ फिल्मस र मुकुन्द भट्ट फिल्मसको व्यानरमा निर्माण हुने फिल्मका लागि नव-प्रस्तुतिमा सिर्जना सिन्हा र फजिल अहमद पनि फाईनल भएका छन् । कार्तिक अन्तिम साताबाट फ्लोरमा जाने यो फिल्मलाई युरोपको स्विजरल्याण्ड, फ्रान्स, स्पेन, इटाली, र अस्ट्रेलियामा खिचिने छ ।
मुकुन्द भट्ट, मुकेश चौधरी र मार्को बस्नेतको पटकथा रहने 'जोजो'मा चिजकुमार श्रेष्ठ र सुवोद भट्टको लगानी रहनेछ । पुरुषोत्तम प्रधानको छायांकन, दीपक आरजेको संगीत रहने फिल्मको लागि सिमसम तामाङले सौगात र अर्पणलाई दुई महिनाको तालिम दिनेछन् ।
