पाँचथर/तप्प तप्प जलविन्दु, चुहाएर के निस्कियो,
कोमल कञ्चन स्निग्ध आहा, नुहाएर के निस्कियो ।
१५० औं मोतीजयन्तीको अवशरमा बिहीबार फिदिममा आयोजित कार्यक्रममा गजलकार प्रकट पंगेनी शिव यसरी माइक्रफोन अगाडि उभिदा कार्यक्रममा उपस्थित पाँचथरे गजल पारखीले जोडले ताली बजाइरहे ।
पाँचथर गजल मञ्चले हरेक वर्ष मोतीजयन्तीको दिन वितरण गर्दै आएको ‘ऐतराज केरुङ स्मृति गजल पुरस्कार’ को चौंथो संस्करणबाट पुरस्कृत प्रकटले एक दर्जन आफ्ना लोकप्रिय गजल सुनाएर पाँचथरेको माया बटुले । खास गरी श्रृङ्गारिक गजलमा मज्जाले खुले प्रकट । उनले सुनाए–
हातमा समाइ उनलाई खोला, तार्नुको मज्जा बेग्लै थियो,
साडीको फेर अलि माथि, सार्नुको मज्जा बेग्लै थियो ।
वारिबाट पारिसम्म, छोंटो बाटो भए पनि,
आलेटाले गर्दै बेला, टार्नुको मज्जा बेग्लै थियो ।
देउराली कास्कीका गजलकार प्रकटलाई विशेष समारोहकाबीच कार्यक्रमका प्रमुख अतिथि डा.घनश्याम न्यौपाने परिश्रमीले दोसल्ला ओढाएर सम्मान गर्दै पुरस्कार वितरण गरेका थिए । पुरस्कारले आफूमा थप जिम्मेवारी थपिएको महशुस गरेको प्रकटले सुनाए ।
गजल मञ्च पाँचथरका संस्थापक अध्यक्ष मधु ‘आजित’ केरुङ र चलचित्रकर्मी सागर केरुङ लगायत परिवारले आफ्ना स्वर्गिय पिता ऐतराज केरुङको स्मृतिमा उक्त पुरस्कारको स्थापना गरेका हुन् । पुरस्कारको राशी सम्मान पत्र सहित ५ हजार ५ सय ५५ रुपैंयाँ रहेको छ ।
कार्यक्रममा बोल्दै प्रमुख अतिथि डा.घनश्याम न्यौपाने परिश्रमिले नेपाली गजल लेखन अहिले शशक्त बन्दै गएको बताए । कार्यक्रममा प्र्रेम ओझा, सुन्दर कुरुप, सगुन सुसारा, कृष्ण उदासी, राज कुमार अनिश्चित लगायत मेची–कोशी अञ्चलका करीव २ दर्जन गजलकारले गजल सुनाए ।
मेची–कोशी गजल प्रतियोगितामा इश्वर प्रथम
१५० औं मोतीजयन्तीकै अवशरमा जिल्लामै पहिलोपल्ट आयोजना गरिएको मेची–कोशी गजल प्रतियोगितामा धनकुटाका गजलकार इश्वर दाहाल प्रथम भएका छन् ।
प्रतियोगितामा झापाका बिनोद चौहान द्धितिय, मोरङका युवराज काफ्ले त्रितिय र धनकुटाका अनन्त अनुराग सान्तवना भए । विजयी प्रतियोगिले क्रमशः प्रमाण पत्र सहित नगद ८ हजार, ६ हजार, ५ हजार र ३ हजार प्राप्त गरेका छन् । त्यस्तै शीर्ष १० मा पर्न सफल गजलकारलाई पनि प्रमाण पत्र र पुरस्कार प्रदान गरियो ।
प्रतियोगिताको शीर्ष १० मा भोजपुरका प्रिन्स याक्खा, झापाका कल्पना आचार्य, मोरङका टीका खड्का, पाँचथरका निलम निश्चल याक्थुङ्बा, कृष्ण परदेशी र बिक्रम पारखी छनौंट भएका थिए । कार्यक्रममा विजयी गजलकारहरुले आ–आफ्नो गजल वाचन गरेका थिए । प्रतियोगितामा मेची र कोशी अञ्चलका ७० जना गजलकारहरुको सहभागिता रहेको गजल मञ्च पाँचथरका सचिव कुबेर मृदुलले बताए ।
