विजयपुर । धरान उपमहानगरपालिका प्रमुख प्रशासकीय अधिकृतविहीन बनेको छ ।
प्रमुख प्रशासकीय अधिकृतका रूपमा कार्यरत सहसचिव तीर्थराज राईको सरुवा भएपछि आइतबार उपमहानगरपालिकाले उनलाई विदाइ गरेको छ । राईको विदाइसँगै धरान उपमहानगरपालिकामा प्रमुख प्रशासकीय अधिकृतको पद रिक्त भएको हो । सरकारले राईको स्थानमा सहसचिव डा. पुष्पराज शाहीलाई प्रमुख प्रशासकीय अधिकृतका रूपमा धरान खटाउने निर्णय गरेको थियो । तर, शाहीले आफ्नो सरुवा निर्णयविरुद्ध प्रशासकीय अदालतमा निवेदन दिएका छन् ।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयको अतिरिक्त समूहबाट शाहीलाई धरान उपमहानगरपालिकामा प्रमुख प्रशासकीय अधिकृतका रूपमा खटाइएको थियो । उनले सरुवा निर्णय बदरको माग गर्दै प्रधानमन्त्री तथा मन्त्रिपरिषद्को कार्यालय, सिंहदरबारसमेतलाई विपक्षी बनाई प्रशासकीय अदालतमा निवेदन दिएका छन् ।
प्रशासकीय अदालतमा दर्ता भएको मुद्दासम्बन्धी विवरणअनुसार शाहीको निवेदन २०८३ असोज १५ गते दर्ता भएको हो । ‘०८३–एआई–००८३’ दर्ता नम्बर रहेको मुद्दाको किसिम ‘अन्तरकालीन आदेशको निवेदन’ र विषय ‘सरुवा निर्णय बदर’ उल्लेख गरिएको छ ।
निवेदनमाथि असोज १६ गते न्यायाधीशद्वय डा. टेकबहादुर घिमिरे र आलोकचन्द्र श्रेष्ठको इजलासमा सुनुवाइ भएको थियो । सुनुवाइपछि अदालतले छलफलका लागि पेश गर्ने र त्यस अवधिसम्मका लागि अन्तरकालीन आदेश जारी गर्ने निर्णय गरेको छ ।
अदालतले दिएको अन्तरकालीन आदेशको अर्थ शाहीको मागबमोजिम सरुवा निर्णय अन्तिम रूपमा बदर भइसकेको भन्ने होइन । सरुवा निर्णयसम्बन्धी विषयमा थप छलफल आवश्यक देखिएपछि अदालतले विपक्षीलाई समेत छलफलका लागि बोलाएको हो । अब हुने छलफल र त्यसपछिको आदेशले शाहीको सरुवा तथा धरानमा उनको पदस्थापनको विषय थप स्पष्ट हुनेछ ।
यता, राईको विदाइ भइसकेको र शाही अदालत पुगेपछि धरान उपमहानगरपालिका तत्कालका लागि प्रमुख प्रशासकीय अधिकृतविहीन बनेको छ ।
