बससँग ठक्कर खाएर कोसी ब्यारेजबाट खसेको ट्रक क्रेनको सहायताले निकालिएको छ ।
हिजो बिहान ७ः४५ बजेको पश्चिमबाट पूर्वतर्फ आउँदै गरेको मे १ ख ३००७ नम्बरको ट्रक ब्यारेजको १० ढोकाको बार भत्काएर सप्तकोसी नदीमा खसेको थियो ।
पूर्वबाट पश्चिमतर्फ जाँदै गरेको मे १ ख १७६५ नम्बरको बस र ट्रक एक आपसमा ठोकिँदै सुनसरीतर्फ पर्ने ढोकाबाट ट्रक नदीमा खसेको थियो। ट्रकसँगै चालकसहित तीन नदीमा खसेकामा तीनै जनाको तत्कालै उद्धार गरिएको थियो ।
ट्रकलाई भने आज बिहान खसेकै ठाउँबाट क्रेनको सहायताले बाहिर निकालिएको हो ।
