धरान/प्रतिनिधि र प्रदेश सभाको दोस्रो चरणमा हुने सुनसरी क्षेत्र नम्बर १ का बामगठबन्धनले निर्वाचन परिचालन कमिटी गठन गर्दै अघि बढेका छन् ।
धरानमा बिहीबार पत्रकार सम्मेलन गर्दै बामगठबन्धनका नेताहरुले एमाले तथा माओवादीबाट छुट्टाछुट्टै निर्वाचन परिचालन कमिटी गठन गर्दै परिचालित गरेको घोषणा गरेका छन् । जसका लागि एमालेबाट प्रकाश राई र माओवादी केन्द्रबाट अइन्द्रबिक्रम बेघाको संयोजकत्वमा ३१ सय सदस्यीय छुट्टाछुट्टै मूल निर्वाचन परिचालन कमिटी गठन भएको हो ।
जसको मातहतमा २१ वटा छुट्टाछुट्टै उपसमितिहरु ग्ठन गरी परिचालित गरिएको एमाले तर्फका संयोजक राईले बताए । मूल समितिलाई संयोजन गर्नको लागि दुबै पार्टीबाट नौ–नौं जनाको १८ सदस्यीय समन्वय समिति गठन गरिएकोसमेत बताइयो । त्यस्तै २१ व्टा उपसमितिमा पनि ३–३ जना रहने गरी समन्वय समिति गठन गरिएको माओवादी तर्फका संयोजक बेघाले बताए ।
त्यस्तै प्रदेश ‘क’ को लागि एमालेबाट वेणू काफ्ले, ‘ख’ बाट निलम खनालको संयोजकत्वमा १५ सय सदस्यीय मूल परिचालन कमिटी र ९ वटा उपसमितिहरु गठन गरिएका छन् । माओवादीबाट ‘क’ मा फोक्वाहाङ सुब्बा (चोत्लुङ) र ‘ख’ मा पुष्प ढुङ्गानाको संयोजकत्वमा १५ सय सदस्यीय मूल समिति र ९ वटा उप समितिहरु गठन भएका छन् ।
प्रदेश ‘क’ को लागि ९–९ सदस्य र ‘ख’ को लागि ७–७ सदस्यीय समन्वय समिति गठन गरिएको छ । वडा र शाखा स्तरमा भने दुबै पार्टीले आ–आफ्नो निर्वाचन परिचालन समिति गठन गर्दै दुबै पार्टीबाट पाँच–पाँच जनाको समन्वय समिति गठन गरिने बताइएको छ । बामगठबन्धनले प्रतिनिधि सभाको लागि जयकुमार राई, प्रदेश सभाको लागि प्रदीप भण्डारी र समानुपातिकमा चेतना श्रेरेङलाई उम्मेदवारको रुपमा परिचित गराइएको छ ।
