जाजरकोट/यहाँका स्थानीय बजारमा पाइने ८० प्रतिशतभन्दा बढी वस्तुको म्याद गुर्जेको पाइएको छ ।
जिल्लाका ग्रामीण क्षेत्रका बजारमा अनुगमन कहिल्यै पनि नहुने भएकाले व्यापारीले म्याद गुर्जेका सामग्री धमाधम बिक्री गर्ने गरेको पाइएको हो ।
जाजरकोट तथा रुकुमका स्थानीय बजारमा खुलेआम यस्ता म्याद गुर्जेका सामग्री बिक्री गर्ने गरेको भए पनि नियामक निकाय भने मौन बसेको स्थानीयको गुनासो छ । जिल्लाका कालीमटी, चौखा, रिम्ना, थलहबजार, घाट, छेडा, मोर्क, तल्लु र रुकुमको आठविसकोट राडीलगायतका दर्जनौँ ठाउँमा यस्तो समस्या देखिएको छ ।
यही बाटो भएर डोल्पा जाने सामग्री पनि अधिकांश म्याद गुज्रेको पाइएको डोल्पाका रामचन्द्र न्यौपानेले बताए । ग्रामीण क्षेत्रका किसान पसलबाट खरिद गरी लिने सामग्रीको म्याद नहेर्ने भएकाले पनि व्यापारीलाई ठग्न सजिलो भएको छ ।
बिस्कुट, विभिन्न पिय पदार्थ, चाउचाउ, खानेतेललगायतका वस्तु बढी म्याद गुर्जेको पाइएको छ । स्थानीय प्रशासनले भने टाढा भएको भन्दै अनुगमनमा आलटाल गर्दै आएको छ । केही औषधि पसलमा समेत औषधिको म्याद गएको फेला परेको छ ।
जाजरकोटका सहायक प्रमुख जिल्ला अधिकारी जनकराज शर्माले तिहारपछि अनुगमनलाई तीव्रता दिइने बताए । वर्षौंदेखि ग्रामीण क्षेत्रमा दर्ता नै नभएका पसलमा म्याद गुर्जेका वस्तुको बिक्री वितरण हुँदै आएको छ । रासस
