इटहरी/नेपाल संवत् ११३७ को अवसरमा आज धरान र इटहरीमा छुट्टाछुट्टै गरी नेवाः पुचः इटहरी र यहाँका विभिन्न आदिवासी जनजाति समुदाय साथै धरानकाे झिगु समाज धरानले विविध कार्यक्रमसहित एकापसमा शुभकामना आदानप्रदान गरेर मनाएका छन् ।
नेपाः बहुउद्देश्यीय सहकारीको प्राङ्गणमा नेपाल संवत्को प्रद्धर्तक शङ्खधर साख्वाको तस्वीरमा माल्यार्पण गरी आदिवासी जनजातिका प्रतिनिधिले एकापसमा शुभकामनासँगै नेपाल संवत् नै नेपालको चलनचल्तीको संवत्का रुपमा मनाउन सरकारलाई दबाब दिनुपर्ने कुरामा जोड दिएका छन् ।
संयुक्त राष्ट्र सङ्घमा नेपालका प्रथम निर्वाचित प्रधानमन्त्री विश्वेश्वरप्रसाद कोइरालाले नेपालको मौलिक आफ्नै नेपाल संवत् भएको विषय उल्लेख गर्नुभएको र त्यसलाई राष्ट्र सङ्घले समेत मान्यता दिएकाले यो संवत्लाई चलनचल्तीको संवत्का रुपमा चलाउन जरुरी रहेकामा वक्ताहरुले जोड दिए ।
नेपाल संवत् शुभकामना आदानप्रदान कार्यक्रममा देह दबु नेपालका केन्द्रीय सदस्य पूर्णकृष्ण श्रेष्ठ, नेवाःपुचः इटहरीका संस्थापक एवम् सल्लाहकार समाजसेवी राजेश श्रेष्ठ ईश्वर सुनवारलगायतले यो संवत्लाई नेवार जातिको मात्र नठानी नेपालको संवत्को रुपमा बुझ्न जरुरी रहेको बताए ।
देवनारायण श्रेष्ठको अध्यक्षतामा भएको सो कार्यक्रमपछि लाखे नाचसहित इटहरी उपमहानगरको विभिन्न स्थानमा नेपाल संवत्को ¥यालीसमेत प्रदर्शन गरिएको थियो ।
उता धरानमा बसोवास गर्दै आएका नेवारको साझा संस्था नेवार एकता समाजले पनि विविध कार्यक्रम गरेर नेपाल संवत्लाई भव्यताका साथ मनाएको छ । रासस
