गाजा। इजरायलले गाजाको ‘येलो लाइन’ आसपास माटोका अग्ला अवरोध र सैन्य संरचना विस्तार गरेपछि प्यालेस्टिनी परिवारहरू थप विस्थापित भएका छन्। जनघनत्व भएका क्षेत्रमा सीमा र सुरक्षा संरचना विस्तार हुँदा स्थानीय बासिन्दाले घर तथा अस्थायी आश्रय छाड्नुपरेको बताएका छन्।
अमेरिकाको मध्यस्थतामा भएको युद्धविराम सम्झौताअन्तर्गत ‘येलो लाइन’ लाई इजरायली सेनाको अस्थायी नियन्त्रण क्षेत्र छुट्याउने सीमाका रूपमा निर्धारण गरिएको थियो। पछिल्लो समय इजरायलले उक्त क्षेत्रमा माटोका बाँध, अवरोध तथा नयाँ सैन्य संरचना निर्माण गरिरहेको देखिएको छ।
अल–तुफाह, जेतुन, देर अल–बलाह, खान युनिस र अल–मवासी क्षेत्रका प्यालेस्टिनीहरूले इजरायली सेनाले पहेँला कंक्रिटका चिन्हहरू सार्नुका साथै केही परिवारलाई सुरक्षित स्थानतर्फ जान निर्देशन दिएको बताएका छन्। संयुक्त राष्ट्रसंघले पनि विस्थापित परिवारहरूले अस्थायी आश्रय गुमाएको र मानवीय सहायता आवश्यक परेको जनाएको छ।
इजरायलले भने यी संरचना आफ्नो सुरक्षा व्यवस्था अन्तर्गत निर्माण गरिएको बताएको छ। इजरायली सेनाका अनुसार यसको उद्देश्य सम्भावित आक्रमण तथा घुसपैठ रोक्नु र आफ्ना सैनिक तथा आसपासका समुदायको सुरक्षा गर्नु हो। सेनाले ‘येलो लाइन’ गैरकानुनी रूपमा सारिएको भन्ने आरोप अस्वीकार गरेको छ।
तर केही इजरायली तथा अन्तर्राष्ट्रिय सुरक्षा विज्ञहरूले बढ्दो अवरोध र सैन्य संरचनाले गाजामा इजरायली सेनाको लामो समयसम्मको उपस्थितिको तयारी संकेत गर्न सक्ने बताएका छन्। भू–उपग्रह तस्बिरहरूमा मूल सीमाभन्दा बाहिरका केही क्षेत्रमा संरचना भत्काउने तथा जमिन सम्याउने गतिविधि पनि देखिएको छ।
गाजामा २० लाखभन्दा बढी मानिस बसोबास गर्दै आएका छन्। बढ्दो प्रतिबन्धित क्षेत्र र निरन्तर विस्थापनका कारण उनीहरूका लागि बसोबासयोग्य स्थान थप साँघुरिँदै गएको छ। यसले पहिलेदेखि नै गम्भीर मानवीय संकटमा रहेको गाजामा भीडभाड र आवासको समस्या थप बढाएको छ।
