भद्रपुर । झापामा एउटा पक्की पुल निर्माणमा पाँचपटक म्याद थप गरिए पनि कामको प्रगति आधा मात्र देखिएपछि निर्माणको ठेक्का तोडिएको छ । झापा गाउँपालिका–२ र गौरीगञ्ज गाउँपालिका–१ जोड्ने हुलाकी राजमार्गअन्तर्गत ७ सय २३ मिटर लम्बाइको कन्काई पुल निर्माणको ठेक्का तोडिएको हो ।
पक्की पुल डिजाइन एण्ड बिल्ड ढाँचामा ३१ जेठ २०६८ मा ठेक्का सम्झौता भएको आयोजनाको काम ३० जेठ २०७२ भित्र सकिनुपर्ने थियो । तर, पाँचपटक म्याद थप गरिए पनि कामको प्रगति करिब ५६ प्रतिशत मात्र रहेको छ । ठेक्का रकम करसहित ३४ करोड नौ लाख रुपैयाँ रहेको ठेक्का सम्झौता रद्द हुँदा निर्माण व्यवसायीको एक करोड ७१ लाख रुपैयाँ कार्यसम्पादन जमानत जफत हुने भएको छ ।
सडक विभागअन्तर्गत हुलाकी राजमार्ग निर्देशनालयको योजना कार्यालय इटहरीले बिहीबार पप्पु महादेव खिम्ती संयुक्त उपक्रम (जेभी) सँगको ठेक्का रद्द गरिएको सार्वजनिक सूचना जारी गरेको छ ।
योजना कार्यालय इटहरीले गत ३१ असोजमा ठेक्का रद्द गर्न किन नहुने भनेर १५ दिने स्पष्टीकरण सोधेको थियो । तर, व्यवसायीले पेस गरेको स्पष्टीकरण चित्तबुझ्दो नहुँदा ठेक्का रद्द गरिएको कार्यालय प्रमुख युवराज पोखरेलले जानकारी दिए ।
निर्माण व्यवसायीको आधिकारिक प्रतिनिधि कार्यक्रममा उपस्थित नभएको, कार्य सम्पन्न गर्न स्रोत परिचालन र कार्यतालिकामा भरोसा दिने योजना नभएको, काम सुचारु गर्न तत्परता नदेखाइएको कारणले ठेक्का सम्झौता उल्लङ्घन भएको उनले जनाए । कानूनअनुसार कार्यसम्पादन जमानत जफत गरिने, बाँकी काम पूरा गर्न आवश्यक रकम सरकारी तरिकाले असुल गरिने र कम्पनी कालोसूचीमा राखिने प्रमुख पोखरेलले बताए ।
महादेव खिम्ती र पप्पु कन्स्ट्रक्सनजस्ता नाम चलेका कम्पनीहरूको संयुक्त उपक्रमले १४ वर्षमा पाँचपटक म्याद पाएको पुल निर्माणमा निराशाजनक प्रगति मात्र देखाएको छ । ठेक्का रद्द गर्ने निर्णय ‘जेन जी’ आन्दोलनपछिका अन्तरिम सरकार र भौतिक पूर्वाधार मन्त्री कुलमान घिसिङको कडा नीतिअनुरूप गरिएको हो । पछिल्लो म्याद २०८० असारमा सकिएको थियो, तर काम वैशाखदेखि पूर्णरूपमा ठप्प भएपछि ठेक्का रद्दको प्रक्रिया अघि बढाइएको थियो ।
गौरीगञ्ज गाउँपालिका र झापा गाउँपालिका जोड्ने करिब ७ सय मिटर लामो पुलको काम सुरुमा रौनियारको कम्पनी पप्पुले सुरु गरेको थियो । तर, उसले काम अलपत्र छोडेपछि सिंहको कम्पनी महादेव खिम्तीले काम अगाडि बढायो । यद्यपि उसले पनि निर्माणमा गति दिएन र पुलको काम अलपत्र बन्यो ।
पुलको निर्माणमा १४ वर्ष बितिसक्दा पनि स्थानीय नागरिकको नियति बदलिएको छैन । बर्खा र हिउँदमा डुङ्गा वा बाँसको पुलमार्फत् जोखिमपूर्ण यात्रा गर्नुपर्छ ।
नदी तरेर करिब पाँच किलोमिटरको यात्रा बर्खामा असम्भव भएपछि पूर्व–पश्चिम राजमार्ग घुमेर करिब ४० किलोमिटरको दूरी तय गर्नुपर्छ ।
बाँसको पुल र डुङ्गाको यात्रा पालिकाले ठेक्का लगाउने भएकाले डुङ्गा र पुल सञ्चालकले एकपटक यात्रा गर्दा मान्छेको ५० तथा मोटरसाइकलसहित मान्छेको १ सय ५० रुपैयाँ लिने गरेका छन् ।
