वराहक्षेत्र । २०७७ सालमा निर्माण सुरु भएको वराहक्षेत्र नगरपालिका–२ चतरामा निर्माणाधीन १५ शøयाको अस्पताल भवनको ६ वर्षमा ३५ प्रतिशत मात्र काम भएको छ ।
निर्माणमा ढिलाइ गर्ने ठेकेदार कम्पनी एमएस प्रतिष्ठा के एन्ड केजी जेभीलाई समयमै काम नगरेपछि स्थानीय तहले कालो सूचीमा राख्ने चेतावनी दिएको छ । नगर प्रमुख रमेश कार्कीले अबको एक वर्षभित्र भवन सम्पन्न नगरे उक्त कम्पनीलाई कालोसूचीमा राखिने स्पष्ट पारे ।
२०७७ सालमा सङ्घीय सांसद् जयकुमार राईद्वारा शिलान्यास गरिएको सो अस्पताल दुई वर्षमै सम्पन्न गर्ने लक्ष्य थियो । तर ६ वर्ष बितिसक्दा पनि जम्मा ३५ प्रतिशत मात्र काम सम्पन्न भएको उनले जानकारी दिए ।
नगर प्रमुख कार्कीका अनुसार विभिन्न बहानामा निर्माणमा ढिलाइ गर्दै आएको कम्पनीलाई केही महिनाअघि काठमाडौंस्थित सङ्घीय स्वास्थ्य मन्त्रालयमा बोलाएर अन्तिम चेतावनी दिइएको थियो । २०८३ सालसम्म पनि काम सम्पन्न नभए कडा कारबाही गरिने जनाइएको छ ।
भवन निर्माण सुरु भएदेखि नै यो योजना विवादित रहँदै आएको छ । २०७९ सालमा काम सम्पन्न गरी अस्पताल हस्तान्तरण गर्ने सम्झौता भए पनि निर्माण कार्यमा ठेकेदार कम्पनीले लापरबाही गरेको स्थानीयको भनाइ छ ।
निर्माणको क्रममा २०७९ सालमा कमसल इँटा प्रयोग गरे पछि नगरपालिका आफैले काम रोकिदिएको थियो । पछि ती इँटा हटाएर काम सुचारु गरिएको थियो । त्यसपछि पनि छतको ढलाइ बाङ्गोटिङ्गो बनाइएको भन्दै पुनः आलोचना भएको थियो । हाल निर्माणाधीन अढाई तले भवनमध्ये अहिलेसम्म केवल एक तला मात्र निर्माण भएको छ । बाँकी कार्य अत्यन्तै सुस्त गतिमा भइरहेको छ ।
चतरा अस्पताल हालैका वर्षमा स्थानीयबासीको प्रमुख स्वास्थ्य सेवा केन्द्र बनेको छ । सुनसरीसँगै उदयपुर, धनकुटा, भोजपुर र सप्तरीबाट दैनिक तीन–चार सय सेवाग्राही आउने अस्पतालमा जम्मा २२ वटा कोठामात्र छन् । अभाव टार्न निर्माण हुँदै गरेको भवन पनि ठेकेदारले अलपत्र पारेपछि बिरामीको उपचारमा समस्या हुँदै आएको अस्पतालले जनाएको छ ।
प्रशासन, चिकित्सक आवास, उपचार कक्षसहितका सेवा सञ्चालनमा समेत चुनौती भएको अस्पतालका सूचना अधिकारी यम भण्डारीले बताए । “भवन अभावका कारण महामारीको बेला बिरामीलाई राख्न सकिने ठाउँ थिएन” उनले भने, “शल्यक्रिया, पोष्टमार्टम, फोहोर व्यवस्थापनलगायतका सेवामा समस्या आइरहेको छ ।”
अस्पतालका डा.नवीन अधिकारीका अनुसार भवन निर्माण सम्पन्न नभएर ज्येष्ठ नागरिक वार्ड, फिजियोथेरापीलगायतका सेवाहरू विस्तार गर्न नसकिएको हो । स्थानीय समाजसेवी तथा नेपाली काङ्ग्रेस नेता नारायण नेपालले सबै पक्ष सहज हुँदाहुँदै पनि अस्पताल भवन निर्माणमा ढिलाइ हुनु दुर्भाग्यपूर्ण भनेका छन् । “प्रधानमन्त्रीकै घोषणाअनुसार देशभर स्वास्थ्यसंस्था स्तरवृद्धिको योजना थियो । तर चतरा अस्पतालको अवस्था हेर्दा अचम्म लाग्छ”–उनले भने ।
पूर्व प्रधानाध्यापक ओमकुमार शर्माले पनि यति लामो समय बित्दासमेत काम किन सम्पन्न हुन नसकेको भन्दै प्रश्न गरेका छन् । उनका अनुसार नयाँ भवन निर्माण सम्पन्न भएमा छिमेकी पहाडी जिल्लाका बासिन्दालाई पनि गुणस्तरीय सेवा पाउने वातावरण बन्नेछ ।
यता ठेकेदार कम्पनी प्रमुख अशोकभक्त श्रेष्ठले काम गरेको रकम समयमा नपाएको गुनासो गरे । “हामीले काम ग¥यौं, तर सरकारले पैसा समयमा दिएन, उनले भने, “कामको रकम तुरुन्त दिनुपर्छ नि, उल्टै झुलाइन्छ ।”
नगर प्रमुख कार्कीका अनुसार १८ करोड अनुमानित लागतको अस्पताल निर्माणको ठेक्का ११ करोड रुपैयाँमा दिइएको हो । त्यसमा आधाभन्दा बढी रकम भुक्तानी भइसकेको बताउँदै उनले अहिले स्थानीय पेटी ठेकेदारमार्फत् दोस्रो तलाको काम थालिएको उनले जानकारी दिए ।
