लहान । सिरहाको लहान नगरपालिका–१८ विसनपुर र शोभापुर टोलका अति विपन्न विद्यार्थीहरूलाई शैक्षिक सामग्री वितरण गरिएको छ ।
रोटरी क्लब अफ अष्ट्रेलिया, दलित जनकल्याण युवा क्लब र लहान नगरपालिकाको सहकार्यमा कक्षा १ देखि ८ सम्मका ४९ जना विद्यार्थीहरूलाई शैक्षिक सामग्री वितरण गरेका छन् । सामग्रीहरूमा स्कुल ब्याग, १२ थान कापी, ड्रेस, पानी खाने प्लाष्टिक बोतल, जुत्ता, पेन्सिल १२ थान, कलम १२ थान, इरेजर ३ र छातासहित रहेका छन् । नगर प्रमुख महेश चौधरीले उक्त सामग्रीहरू विद्यार्थीहरूलाई हस्तान्तरण गरेका थिए ।
“हामीले अङ्ग्रेजी माध्यम सुरु गरेका विद्यालयहरूमा नगरपालिकाबाट पनि विद्यार्थीहरूलाई कापी दिने गरेका छौँ” नगर प्रमुख चौधरीले भने, “आउने दिनमा यहाँ केही मुसहर समुदायका बालबालिकाका लागि निःशुल्क ट्युसन कक्षा सञ्चालन गर्ने योजनामा छौँ ।” विद्यार्थीहरूले कापी बोकेर विद्यालय नआउने गरेको गुनासो शिक्षकहरूबाट आएपछि नगरपालिकाले विद्यार्थीहरूलाई कापी दिने गरेको र सो कापी शिक्षणपछि कापी विद्यालयमै राख्ने गरेको उनले बताए ।
यहाँका दुवै टोलमा दलित जनकल्याण युवा क्लबले निःशुल्क ट्युसन कक्षा सञ्चालन गरेको छ । पहिले विद्यालय गएर १ देखि ३ वर्षसम्म स्कुल छोडेका र विद्यालय पहुँचभन्दा बाहिर रहेका बालबालिकालाई लक्षित गरेर ट्युसन पढाउने र विद्यालय पठाउने कार्य भइरहेको क्लबका कार्यकारी निर्देशक विनोद विसुन्केले जानकारी दिए । दलित समुदायका विद्यार्थीहरूमा सदाय, राम र मुस्लिम समुदायका बालबालिकाहरू छन् । जन्मदर्ता नभएकाहरूलाई जन्मदर्ता बनाएर विद्यालयमा भर्ना गरिएको छ । दलित बालबालिकासँग शैक्षिक सामग्री नभएर विद्यालय नियमित नभएको गुनासो हटेको निर्देशक विसुन्केले सुनाए । अनौपचारिक तथा वैकल्पिक शिक्षा अन्तर्गत ०८१ फागुन महिनादेखि यहाँका दुवै टोलमा ट्युसन कक्षा सञ्चालित छ । दैनिक दुई घण्टा पढाउने गरेको र शिक्षकको व्यवस्थापन दलित जनकल्याण युवा क्लबले गरेको छ ।
