विराटनगर । प्रदेशको स्वास्थ्य सेवा प्रणालीमा आयुर्वेदलाई बलियो बनाउने उद्देश्यका साथ कोशी प्रदेश सरकारले सिंहदरबार वैद्यखाना विकास समितिसँग औषधि खरिदको लागि सम्झौता गरेको छ ।
प्रदेश स्वास्थ्य मन्त्रालयले नेपालको सबैभन्दा पुरानो र एकमात्र सरकारी औषधि उत्पादक सिंहदरबार वैद्यखाना विकास समितिसँग २ करोड २० लाख रुपैयाँ बराबरको औषधि खरिद गर्ने सम्झौता गरेको हो ।
यो सम्झौतासँगै कोशी प्रदेश, सिंहदरबार वैद्यखानासँग सरकारी–सरकारी (जेटुजि) मोडलमा सिधै औषधि खरिद गर्ने देशको पहिलो प्रदेश बनेको छ ।
सोमबार विराटनगरमा आयोजित एक कार्यक्रममा कोशी प्रदेशका स्वास्थ्य मन्त्री भुपेन्द्र राईको उपस्थितिमा सम्झौतामा हस्ताक्षर भएको हो । मन्त्रालयको तर्फबाट स्वास्थ्य सचिव डा. राधिका थपलिया र सिंहदरबार वैद्यखाना विकास समितिको तर्फबाट कार्यकारी निर्देशक डा. प्रदीप केसीले सम्झौता पत्रमा हस्ताक्षर गरे । यस सम्झौताले प्रदेशभित्रका नागरिकलाई गुणस्तरीय र भरपर्दो आयुर्वेदिक औषधि सहजरूपमा उपलब्ध गराउने मार्ग प्रशस्त गरेको छ ।
चालु आर्थिक वर्षका लागि विनियोजन गरिएको २ करोड २० लाख रुपैयाँको बजेटबाट मन्त्रालयले वैद्यखानाद्वारा उत्पादित २३ प्रकारका अत्यावश्यक आयुर्वेदिक औषधिहरू खरिद गर्नेछ । यो बजेट तीन मुख्य स्रोतबाट जुटाइएको हो । जसमा आपूर्ति व्यवस्थापन केन्द्र कोशीका लागि ६३ लाख, जिल्ला आयुर्वेद अस्पतालहरूका लागि ६७ लाख र सङ्घीय सरकारबाट प्राप्त अनुदानको ९० लाख रुपैयाँ समावेश छ ।
यो खरिद प्रक्रिया पारदर्शी र प्रभावकारी मानिने ‘जेटुजि’ (सरकारदेखि सरकार) प्रविधिमार्फत् हुनेछ । यसले सार्वजनिक खरिदमा देखिने झन्झटिलो र ढिलासुस्तीको प्रक्रियालाई छल्दै छिटो र सुलभ रूपमा औषधि आपूर्ति सुनिश्चित गर्ने विश्वास लिइएको छ ।
सुशासन र गुणस्तरमा जोड
कार्यक्रममा बोल्दै प्रदेशका स्वास्थ्य मन्त्री भुपेन्द्र राईले प्रदेश सरकार नागरिकको स्वास्थ्यप्रति संवेदनशील रहेको र सुशासन कायम गर्दै गुणस्तरीय सेवा प्रदान गर्न प्रतिबद्ध रहेको बताए । “हामीले जनतालाई वितरण गर्ने औषधि गुणस्तरीय हुनैपर्छ । सिंहदरबार वैद्यखाना नेपालको गौरव हो र यसको आफ्नै ऐतिहासिक विरासत छ” मन्त्री राईले भने, “त्यसैले हामीले टेन्डर प्रक्रियाको झन्झटमा नपरी सिधै वैद्यखानासँग सम्झौता गरेका हौं । यसले पारदर्शिता सुनिश्चित गर्छ र जनताले उत्कृष्ट औषधि पाउँछन् ।”
उनले यो सम्झौता कोशी प्रदेशको आयुर्वेद स्वास्थ्य क्षेत्रका लागि कोशेढुङ्गा साबित हुने विश्वास व्यक्त गरे । कोशी प्रदेश स्वास्थ्य मन्त्रालय र सिंहदरबार वैद्यखानाबीचको यो सम्झौताले प्रदेशमा आयुर्वेदिक स्वास्थ्य सेवालाई सुदृढ गर्न, नागरिकलाई गुणस्तरीय औषधि निःशुल्क उपलब्ध गराउन र सरकारी निकायहरूबीचको सहकार्यलाई प्रवद्र्धन गर्न महŒवपूर्ण भूमिका खेल्ने उनले बताए ।
मन्त्रालयकी सचिव डा. राधिका थपलियाले सिंहदरबार वैद्यखानाको लामो र गौरवपूर्ण इतिहास रहेको बताउँदै यसका उत्पादनहरू गुणस्तरीय र विश्वसनीय भएकोले नै सहकार्यको लागि रोजिएको स्पष्ट पारिन् । इतिहास बोकेको संस्थाबाट गुणस्तरीय औषधि खरिद गर्ने उनले बताइन् । सचिव थपलियाका अनुसार, प्रदेश स्वास्थ्य मन्त्रालय मातहत रहेका १५ वटा अस्पताल र आपूर्ति व्यवस्थापन केन्द्र गरी कुल १६ निकायले औषधि खरिद गर्नेछन् । ती निकायहरूले आफ्नो आवश्यकता र बजेटको आधारमा औषधिको सूची तयार पारेर सोझै वैद्यखानाबाट खरिद गर्नेछन् । उनले भनिन््, “यस प्रक्रियाले समयमै औषधि आपूर्ति हुनेछ र म्याद सकिने समस्या पनि हट्नेछ ।”
यस सम्झौताको सबैभन्दा उल्लेखनीय पक्ष भनेको खरिदमा प्राप्त हुने ८० प्रतिशत छुट हो । सचिव थपलियाले भनिन्, “सिंहदरबार वैद्यखानासँग सिधै खरिद गर्दा हामीले ८० प्रतिशत छुट पाउनेछौँ । यो प्रदेश सरकारका लागि ठूलो आर्थिक बचत हो ।” उनले छुटबाट बचत भएको रकमले थप औषधि खरिद गरी नागरिकलाई अझ बढी सेवा दिइने जानकारी दिइन् । यसले सीमित बजेटमा पनि धेरै नागरिकसम्म आयुर्वेदिक सेवा पु¥याउन मद्दत पुग्नेछ ।
विगतमा दुई पटक औषधि खरिद हुने गरेको थियो, एक पटक आपूर्ति केन्द्रले र त्यसपछि जिल्लाहरूले खरिद गर्थे । अब भने यो प्रक्रिया एकीकृत र सरल बनेको छ, जसले गर्दा खरिद प्रक्रिया छिटो र प्रभावकारी हुने अपेक्षा गरिएको छ ।
सिंहदरबार वैद्यखाना विकास समितिका कार्यकारी निर्देशक डा. प्रदीप केसीले यो सम्झौतालाई ऐतिहासिक भन्दै कोशी प्रदेशले अग्रगामी कदम चालेको बताए । “सात प्रदेशमध्ये सरकारीस्तरमा सिधै हामीसँग औषधि खरिद गर्ने कोशी पहिलो प्रदेश हो” डा. केसीले भने, “यो सहकार्यले वैद्यखानालाई मात्र नभई समग्र आयुर्वेद क्षेत्रलाई नै प्रोत्साहन मिलेको छ ।”
उनले वैद्यखाना गुणस्तरीय औषधि उत्पादन गर्न पूर्ण सक्षम रहेको र हाल ५७ प्रकारका औषधि उत्पादन गरिरहेको जानकारी दिए । “हामीले आगामी दिनमा उत्पादन क्षमता बढाएर ९० प्रकारका औषधि बनाउने लक्ष्य राखेका छौँ” उनले भने, “कोशी प्रदेशको यो विश्वासले हामीलाई थप ऊर्जा दिएको छ । हामी गुणस्तरमा कुनै सम्झौता नगरी तोकिएको समयमा औषधि उपलब्ध गराउन प्रतिबद्ध छौँ ।”
पछिल्ला केही वर्षहरूमा व्यवस्थापकीय कमजोरी र सरकारी उदासीनताका कारण उत्पादनमा ह्रास आएको वैद्यखानाले अब भने पुनर्जीवन पाउने सङ्केत देखिएको छ । कोशी प्रदेशसँगको यो सम्झौताले वैद्यखानाको बजार विस्तार र आर्थिक स्थायित्वमा समेत टेवा पुग्ने देखिन्छ ।
