भण्टाबारी । जाडो बढिरहेको बेला कोशी टप्पु वन्यजन्तु आरक्षबाट निस्केर आउने हात्तीको समूह मानव बस्तीमा ताण्डव मच्चाउने गरेको छ । कोरोना महामारीका कारण लामो लकडाउनमा काम गर्न नपाउदा हातमुख जोर्न समस्या भइरहेको बेला हात्तीले घर भत्काईदिदा कोशी क्षेत्रका विपन्न समुदायको बिचल्ली भएको छ ।
वन्यजन्तु आरक्षबाट निस्केर आएको जंगली हात्तीले कोशी गाउँपालीका ५ स्थित कुम्याहीमा बिहीबार रातभर ताण्डव मच्चाएको स्थानीय सागर पण्डितले जानकारी दिए ।
आरक्षबाट गाउँमा आएको दुईवटा हात्तीले स्थानीय चतुरिनन्द पण्डितको घर तोडफोड गर्दै घरभित्र रहेको धान,गहुँ,चामल खाएर नष्ट गरिदिएको उनले बताए । हात्तीलाई स्थानीयबासी सशस्त्र प्रहरी र नेपाल प्रहरीले पटका र ट्याक्टरको सहाराले धपाएका थिए ।
जाडो बढिरहेको समयमा दिनहुुँ गाउँ पस्ने हात्तीका कारण जीवनयापन गर्न निकै समस्या भएको सागरले गुनासो गरे । कोशी टप्पु वन्यजन्तु आरक्षबाट मानव बस्ती प्रवेश गर्ने हात्तीको समूहले आरक्ष आसपास क्षेत्रमा बसोबास गर्ने स्थानीयको बिल्लिबाठ पार्दै आएको छ ।
नियमितरूपमा आउने हात्तीको समूहले पछिल्लो एक महिनाको अवधिमा कोशी क्षेत्रमा १४ वटा घर भत्काईदिएको कोशी गाउँपालीका ४ का विध्यान्न यादवले बताए ।
कोरोना महामारीका कारण काम गर्न नपाइरहेको अवस्थामा विपन्न समुदायले जोहो गरेर राखेको अन्नसमेत हात्तीले खाएर नष्ट गरिदिदा समस्या थपिएको उनको भनाइ छ ।
विपन्न समुदायलाई एक छाक टार्न धौधौ परिरहेको बेला हात्तीले खाद्यान्न लगायतका सामाग्री नष्ट गरिदिने क्रम बढेपछि उनीहरूको दैनिकी कष्टकर बनेको हो । साँझपरेपछि आरक्षबाट बस्ती आसपास लुकेर बस्ने हात्तीको समूह मध्यरातमा घर भत्काउने गरेको छ । जाडोको समयमा घरमा आराम गरिरहेको बखत मध्यरातमा आएको हात्तीले घर भत्काउन थालेपछि भागेर ज्यान जोगाएको चतुरिनन्दले जानकारी दिए ।
हात्तीले घर भत्काएर अन्नपात खाएर नष्ट गर्दै अन्य बहुमुल्य सामान क्षति गरिदिदा अन्दाजी १ लाख बराबरको क्षति भएको उनको भनाइ छ् । रोजगारी खोसिएको बेला हात्तीले घर भत्काई खाद्यान्नसमेत खाइदिएपछि छाक टार्न समस्या भएको उनले गुनासो गरे ।
आरक्षबाट निस्केर आएको हात्तीको समूहले केही दिनअघि कोशी गाउँपालीका ४ र ६ नम्बर वार्डमा ८ वटा घर भत्काई भण्डारण गरेर राखिएको धान,गहुँ खाएर नष्ट गरेको थियो ।
