धरान / नयाँ शक्ति पार्टी जुम्लाका पूर्वसंयोजक धीरज महत संरक्षित वन्यजन्तु (रेडपाण्डा) रातो हाब्रेको छालासहित प्रक्राउमा परेका छन् । रेडपाण्डाको छालासहित महत गत चैत १८ गते बाँके जिल्लाबाट पक्राउ परेका थिए ।
पार्टीका पूर्वसंयोजक महत पार्टी नीति र नियमविपरीत कार्यमा संलग्न रहेकाले यस्तो कार्यमा पार्टीको कुनै संलग्नता नरहेको सो पार्टीले स्पष्ट पारेको छ । एक प्रेस विज्ञप्ति जारी गर्दै नयाँ शक्ति पार्टीले पूर्वसंयोजक महत व्यक्तिगत लोभमा परी पार्टीलाई समेत बदनाम गरेको भन्दै गम्भीर ध्यानाकर्षण भएको जनाएको छ ।
पार्टीका जिल्ला इञ्चार्ज नरेन्द्रनाथ योगीद्वारा हस्ताक्षरित विज्ञप्तिमा महतले राष्ट्रिय वाणिज्य बैंक जुम्लामा रहेको पार्टीको खातामा व्यक्तिगत प्रयोजन प्रयोग गरेको अन्य व्यक्तिलाई प्रयोग गर्न दिएको जनाइएको छ । पार्टीको हितविपरीत कार्यमा संलग्न निज महतलाई पार्टीको साधारण सदस्यसमेत नरहने गरी कारवाही गरिएको विज्ञप्तिमा उल्लेख गरिएको छ ।
उक्त विज्ञप्तिमा महत पार्टीको संयोजक हुँदा उनकाे नाममा खोलिएको खाताको दुरुपयोग भएकाप्रति र कालोबजारीमा संलग्न रहेको पाइएकाले पार्टीको कारवाहीमा परेको जनाइएको छ । उता जिल्ला वन कार्यालय बाँकेका रेञ्जर रमेश बुढाथोकीले अहिले कार्यालयले यस विषयमा थप अनुसन्धान गरिरहेको बताए । अनुसन्धानका क्रममा पक्राउ परेका महतले आफूसँगै अन्य दुई जनाको संलग्नता रहेको बताएको पाएका छन् । अहिले सीप विकास कार्यालयमा इलेक्ट्रिसियन पदमा कार्यरत बब्लु भनिने कमाल लुदिन इन्द्रिस र समीर नाम गरेका ठेगाना खुल्न नसकेको यकिन व्यक्ति भएको बताए ।
