प्रधानमन्त्री देउवाले शान्ति सुरक्षा कायम गर्न सकेनन् : ओली

विराटनगर/ नेकपा एमालेका अध्यक्ष केपी शर्मा ओलीले बम पड्काउने र शान्ति सुरक्षामा अवरोध गर्नेहरुलाई सरकारले प्रभावकारी ढंगले नियन्त्रण नगरेको आरोप लगाएका छन् । उनले बम पड्काउनेहरु लोकतन्त्र र लोकतान्त्रिक प्रणाली विरोधी रहेको बताए ।विराटनगर विमानस्थलमा आज शनिबार पत्रकारसँग कुरा गर्दै ओलीले यसअघि पनि सरकारले निर्वाचन नगर्ने मनसायले विभिन्न गतिविधि गरेको भन्दै ओलीले अहिलेको श्रृंखलाबद्ध बम विष्फोट हुनुमा शंका रहेको भएपनि प्रमाणित भने गर्न नसकिने बताए । उनले प्रधानमन्त्री देउवालाई शान्ति सुरक्षा कायम गर्न नसकेकोप्रति ओलीले असक्षमताको आरोप लगाए ।

‘उनलाई असक्षम, अक्षम जस्ता आरोप त पहिलेकै ट्याग हो नि,’ ओलीले भने, ‘काम चलाउ सरकारमा गृहमन्त्री पनि नभएको र प्रधानमन्त्रीको पनि राजिनामा माग्ने कुरा भएन, फेरि चुनाव भाँडिन्छ ।’ बामपन्थीहरुको बहुमत आएपछि लोकतान्त्रिक प्रणाली, कानूनी राज्य, पारदर्शीता, भ्रष्टाचार नियन्त्रण, विकास निर्माण, विकासका प्रतिफल जनतालाई दिने र समाजवाद उन्मुख नीति लिइने ओलीको भनाई थियो । सरकारले विगतमा भएका विभिन्न राष्ट्रिय महत्वका आयोजनाको सम्झौता खारेज गर्ने जस्ता काम गर्नु अलोकतान्त्रिक भएको बताउँदै ओलीले सरकारका मन्त्रीहरु पनि आफ्ना सीमा र लोकतान्त्रिक मान्यता विपरीतका गतिविधिमा लागिरहेको बताए । कम्युनिष्ट शासन आए जनताले विहे पनि गर्न नपाउने प्रधानमन्त्रीको भनाईप्रति व्यंग्य गर्दै ओलीले आफू प्रधानमन्त्री हुँदा कसैको विहे नरोकिएको बताए ।

‘प्रधानमन्त्रीले यति सारो सिद्धान्त, विचार, नीति केही नभएर अनावश्यक कुरा गरेर दिग्भ्रमित पार्न खोजेर हुन्छ,’ ओलीले भने, ‘पराजयको त्रास र हतासाको अभिव्यक्तिप्रति म टिप्पणी गर्दिन, म प्रधानमन्त्री हुँदा कसैको विहे रोकिएको थिएन ।’ सरकारले कार्यकर्तालाई करोडौं रुपैयाँ बाँडेको विषयमा ओलीले त्यस्ता घटनाको छानविन हुनुपर्ने बताए । ओलीले सरकारले गरेका यसखालका क्रियाकलाप रोक्न निर्वाचन आयोगले प्रभावकारी काम गर्न नसकेको घुमाउरो जवाफ दिए । ‘निर्वाचन आयोगले सरकारको मनपरी रोक्न कत्तिको प्रभावकारी काम गरिरहेकोे छ भन्ने विषयमा तपाईहरुलाई पनि थाहा होला,’ ओलीले भने ।