तेहरान (इरान)/इरानमा शनिबार रेल्वेका तीन अधिकारीहरु पक्राउ परेका छन् ।
शुक्रबार इरानको सिमनान प्रान्तमा दुई वटा रेल एकआपसमा ठोक्किँदा भएको दुर्घटनामा परी कम्तीमा ४४ व्यक्तिको मृत्यु भएपछि ती तीन रेल्वे अधिकारीहरुलाई पक्राउ गरिएको इर्ना समाचार समितिका अधिकारीहरुले जनाकारी दिएका छन् ।
उत्तरी प्रान्त सिमनानमा यस दुर्घटनामा परी ४४ व्यक्तिको मृत्यु हुनुको साथै अन्य दर्जनाैँ घाइते भएका छन् ।
इरानका सर्वोच्च नेता आयातोल्लाह अलि खमेनीले शनिबार भएको यस पीडादायक घटनाप्रति समवेदना प्रकट गरे । यो घटना इराकमा भएको आतङ्ककारी आक्रमणमा ६० भन्दा बढी इरानीको मृत्युको एक दिनपछाडि नै भएको छ ।
शुक्रबार बिहानै भएको यस घटनामा सुरुमा कम्तीमा ३१ जनाको मृत्यु भएको प्रान्तीय गभर्नर मोहम्मद रेजा खावाजले यहाँको राष्ट्रिय टेलिभिजनसँगको कुराकानीमा बताए।
घटनामा घाइते भएकाहरुको स्थानीय अस्पतालमा उपचार भइरहेको बताइएको छ ।
घाइतेमध्ये केहीको अवस्था गम्भीर भएकाले मृतक सङ्ख्या बढ्न समेत प्रहरीको अनुमान रहेको छ । रासस/एएफपी
