संयुक्त राष्ट्रसङ्घ/संयुक्त राष्ट्रसङ्घका महासचिव वान की मुनले सैन्य उपायबाट सिरिया सङ्कट समाधान नहुने बताएका छन्।
रसियाले एकपक्षीय रुपमा गरेको युद्धविरामको स्वागत गर्ने क्रममा बिहीबार उनले शान्तिप्रक्रियाबाट नै सिरियामा जारी द्वन्द्वको समाधान खोज्नु पर्ने विषयमा जोड दिए ।
महासचिव बानले पूर्वी एलेप्पोमा पूर्ण मानवीय सहयोगको आवश्यकता रहेको बताए । उनका अनुसार, गत सेक्टेम्बर २३ देखि हालसम्म सिरियाको एलेप्पोसहरमा जारी द्धन्द्धमा परी ५०० जनाको मृत्यु हुनुको साथै अन्य २ हजार जना घाइते भएका छन् । झण्डै दुई लाख ७५ हजार नागरिक द्धन्द्धका कारण प्रभावित भएको पनि राष्ट्रसङ्घको अनुमान रहेको छ ।
“अवको मुख्य विषय भनेकै राजनीतिक रुपान्तरण गर्नु हो । त्यसका लागि सरोकारवालाहरुको संयुक्त जिम्मेवारीलाई मेरो पूर्ण सहयोग रहन्छ ,” महासचिव बानले भने ।
सिरिया सन् २०११ मा सिरियाली राष्ट्रपति बसर अल असदको राजिनामाको माग गर्दै सुरु भएको जनआन्दोलनले पछिल्ला कैयौँ वर्षदेखि गृहयुद्धको रुप लिएको छ ।
जारी गृहयुद्धको क्रममा आइएस जिहादी समूह, अल कायदा र कुर्दिस लडाकूहरुको बिगबिगी जारी रहेको बताइन्छ । यसको कारण छिमेकमा रहेका टर्कीगायतका देशहरुको सिमानामा हिंसा पनि बढेको पाइन्छ ।
सिरियामा गएको पाँच वर्षभन्दा लामो समयदेखि जारी रहेको हिंसामा परी दुई लाख ९० हजार भन्दा बढी व्यक्तिको निधन भएको छ । रासस/सिन्ह्वा
