हिन्दू धर्मावलम्बीहरुका आराध्यदेव महादेव शिवको पूजाअर्चना गर्दै देशभर महाशिवरात्री पर्व मनाइदैछ ।
शिवको विधिपूर्व पूजा अर्चना गर्न आज बिहानैदेखि भक्तजनहरुको शिवालयहरुमा घुइँचो लागेको छ ।
राजधानीको पशुपति नाथ, धरानको पिण्डेश्वरलगायतका शिवालयमा शिवको धुमधाम पूजाअर्चना हुने गरेको छ । शिवको पूजा आराधना गरे सुख, शान्ति प्राप्त हुने धार्मिक विश्वास छ । यही विश्वासका साथ वैदिक सनातन हिन्दू धर्मावलम्बीले बिहानैदेखि नदी, कुण्ड र तलाउमा स्नान गरी शिवालयमा गई श्रद्धाभक्तिपूर्वक पूजा–आराधना गर्दछन् ।
धरान १४ विजयपुरस्थित पिण्डेश्वर महादेवालयमा आज बिहानैदेखि भक्तजनको घुइँचो छ । आज बिहान लघुरुद्री पूजा सम्पन्न भएको छ भने साँझ लक्षदीप प्रज्ज्वलन गरिने पिण्डेश्वर बाबाधाम समितिका अध्यक्ष विकास बनेपालीले जानकारी दिए । पिण्डेश्वरमा साँझ लाख बत्ती बालिने र धुनी जगाउने परम्परा रहिआएको छ ।
कोरोना संक्रमणका कारण पिण्डेश्वरमा भारतीय बाबाहरुको चहलपहल भने कम छ । तर स्थानीय भक्तजनहरुले भने श्रद्धाआस्थाका साथ पूजाअर्चना गरेका छन् ।
