भद्रपुर । झापामा सोमबार राति चट्याङले लागेर प्रहरी सहायक निरीक्षक(असइ)को मृत्यु भएको छ ।
मृत्यु हुनेमा भद्रपुर नगरपालिका–२ को अस्थायी प्रहरी चौकी किच्चकबधमा कार्यरत ४७ वर्षीय महादेव ठाकुर रहेको जिल्ला प्रहरी कार्यालय झापाले जनाएको छ ।
राति १० बजेतिर साइकलमा गस्ती गर्दै गर्दा वर्षासहित परेको चट्याङले ठाकुरलाई लागेको जिल्लाका डिएसपी राकेश थापाले बताए ।
चट्याङले लाग्नासाथ उनलाई उपचारका लागि भद्रपुरको ओमसाइ पाथीभरा हस्पिटल ल्याएपनि उनलाई तत्कालै चिकित्सकले मृत घोषित गरेको थापाले जनाए ।
गस्तीमा उनीसहित दुईजना निस्केका थिए । सँगैरहेका प्रहरी हवल्दार सकुशल रहेका बताइएको छ । मृतक ठाकुर सो चौकीका प्रमुख थिए ।
