विराटनगर / विराटनगरका औषधि व्यवसायी ३३ वर्षिय देवीप्रसाद दुलालको हत्या आरोपमा प्रहरीले श्रीमतिसहित तीन जनालाई पक्राउ गरेको छ ।
प्रहरीले दुलालकी श्रीमति मीना श्रेष्ठ, सिराहा लहान नगरपालिका १० घर भई हाल विराटनगरमा बस्ने २१ वर्षिय ब्रहमदेव साह र इटहरी उपमहानगरपालिका १२ का २० वर्षीय सोनु साहलाई पक्राउ गरेको हो ।
इटहरी–१२ खनार घर भई विराटनगर १० मधुमारामा देवी माँ पाथीभरा फर्मा नामक औषधि पसल सञ्चालन गर्ने दुलालको आइतबार बिहान शंकास्पद मृत्यु भएको थियो ।
ओछ्यामा बेहोस भेटिएको भन्दै उनकी श्रीमति मीना श्रेष्ठ दुलालसहितले विराटनगरस्थित गोल्डेन अस्पतालमा लगेकोमा उनको मृत्यु भइसकेको थियो । मृतकको शरिरमा चोट देखिएको र श्रीमति मीनाको भनाई बाँझिएको देखिएपछि अनुसन्धान गर्दा उनकै योजनामा हत्या भएको मोरङ प्रहरीको अनुसन्धानबाट खुलेको हो ।
श्रीमती मीना र ब्रह्मदेवको मुख्य योजनामा सोनुको पनि संलग्नमा दुलालको हत्या गरेको मोरङ प्रहरीका प्रमुख एसपी विश्व अधिकारीले जानकारी दिए । प्रहरीले मीना र ब्रम्हदेवलाई आइतबार पक्राउ गरेको थियो भने सानुलाई सोमबार दिउँसो पक्राउ गरेको हो । पक्राउ परेका तीनै जनालाई मोरङ प्रहरीले सोमबार साँझ भिडियो कन्फ्रेन्स मार्फत पत्रकार सम्मेलन गरि घटना सार्वजानिक गरेको छ ।
देवीप्रसादको श्रीमतिसँग सम्बन्ध राम्रो नभएको र मनमुटाव भइ झैझगडा हुँदै आएकोले मीनाको योजना अनुसार हत्या भएको प्राराम्भिक चरणको अनुसन्धानबाट खुलेको एसपी अधिकारीले बताए ।
हत्यामा संलग्न ब्रम्मदेव चार वर्षदेखी दुलालको औषधि पसलमा काम गरेका थिए । श्रीमतिसँगको हिमचिमबारे जानकारी पाएपछि दुलालले ७ महिना अगाडि साहलाई कामबाट निकालि दिएको खुलेको छ । त्यसपछि उनीहरुले दुलालको हत्या योजना बनाएको प्रहरी अनुसन्धानमा खुलेको छ ।
यसरी गरे हत्या
मीनाको श्रीमान देवीप्रसादसँग मनमुटाव भइ दैनिक जसो झैझगडा हुने गरेकोले पसलमा काम गर्ने ब्रम्हदेवलाई सुनाएका थिए । श्रीमानको हत्या गरे टेनसन साप हुने भएकोले उनीहरूले हत्या योजना ब्रम्हदेवलाई सुनाएका थिए । मीनाले शनिबार कोठामा ककटेल पार्टी हुने जानकारी ब्रम्हदेवलाई सुनाएका थिए । त्यही अनुसार हत्याको योजना मीना र ब्रम्हदेवले बनाउँछन् ।
ब्रम्हदेवले हत्यामा उनको साथी सोनुको पनि सहयोग लिन्छन् । देवीप्रसाद र उनका व्यवसायी साथीहरू बिच शनिबार राती कोठामा ककटेल पार्टी चल्छ । ९ बजे पार्टी सकिएपछि देवीप्रसादका व्यवसायीक साथीहरू आ–आफनो घरतर्फ लाग्छन् । दुलाल आफ्नो कोठा तिर जान्छन् । मीनाले ढोका खोलिदिए पछि दुलालको कोठामा ब्रम्हदेव र सोनु आइपुग्छन् । देवीप्रसाद सुतिनसकेको हुनाले मीनाले उनीहरूलाई सिढीमा लुकाउँछिन् । ११ बजे देवीप्रसाद सुतेपछि प्लाष्टिकको डोरीले घाँटी कसेर हत्या गरेको प्रारम्भिक अनुसन्धानबाट खुलेको एसपी अधिकारीको भनाइ छ ।
हातमा पञ्जा लगाएर डोरी प्रयोग गर्दै हत्या गरेको खुलेको छ । ब्रह्म्मदेवले प्लाष्टिकको डोरीले घाँटी कसेका थिए भने ज्ञानुले खुट्टा समातेर हत्या गरेकोे प्रारम्भिक अनुसन्धानबाट देखिएको प्रहरीले जनाएको छ । घाँटी कसेपछि थाहा पाएर उठ्न खोज्दा झ्यालमा ठोक्किएर देवीप्रसादको वायाँ आँखामा चोट समेत लागेको प्रहरीको भनाइ छ । दुलालको नाक, हात, घाँटी र वायाँ आँखाको डिलमा चोट लागेको र मुखबाट रगत पनि बगिरहेको अवस्थामा शव थियो । उनी सुतेको ओछ्यानमा रगत लतपतिएको थियो भने घाँटीमा डोरीले कसेको डाम थियो । दुलालको घाटीको डाम हटाउन मीनाले पाउण्डर पनि दलेकी थिइन् ।
प्रहरी नियन्त्रणमा रहेकी मीनाले सुरुमा भने श्रीमानलाई उच्च रक्तचापको समस्या रहेको र त्यही कारणले मृत्यु भएको हुनसक्ने भन्दै ढाँट्ने प्रयास गरेको प्रहरी अनुसन्धानमा संलग्न प्रहरीको भनाई छ । हत्यापछि ब्रम्हदेवले सोनुलाई मोटसाइकलमा राती २ बजे इटहरीको खनारस्थित घर पुराएर उनी विराटनगर डेरामा फर्किएका थिए । कोठामा आएर आरमा गरेपछि विहान सबेर विराटनगर ४ बरगाछीस्थित काम गर्ने फार्मेशीमा गएका थिए ।
हत्याको योजना शुक्रबार बनेको थियो
प्रहरीका अनुसार मीना र ब्रम्हदेव नजिकको साथी जस्तो थिए । ब्रह्मदेव चार वर्षदेखि दुलालकै औषधि डिलरमा काम गर्थे । त्यही क्रममा मीनासँग उनको हिमचिम बढेको चाल पाएर श्रीमान देवीप्रसाद दुलालले ब्रह्मदेवलाइ कामबाट निकालिदिएको खुलेको बताइएको छ । प्रहरीका अनुसार मीनाले शुक्रबार ब्रम्हदेवसँग सल्लाह गरेर हत्याको योजना बनाएको प्रारम्भिक अनुसन्धानबाट खुलेको छ । हत्यापछि बिरामी भएको देखाउन अस्पताल लगेर घटनालाई स्वभाविक मृत्यु भन्ने बनाउन खोजेको पाइएको प्रहरीको भनाइ छ ।
प्रहरीले घटनामा प्रयोग गरिएको डोरी र पञ्जा विराटनगर–९ स्थित झाडीमा फेला पारेको छ । प्रहरीले हत्यामा प्रयोग भएको ४ थान मोवायल, प्रयोग भएको ८ थान सिमकार्ड, एयलमक पाउडर १ थान, कपडाको ब्याण्डेज १थान, नाइलनको डोरी २ थान, सर्जिकल पन्जा ८ जोर, घटनास्थलबाट उठएको रगत लागेको बेडकभर १ थान, सिरानीको खोल, ब्लयाङकेटको टुक्रा थान १ र चुडिएको सिक्री पनि बरामद गरेको छ ।
हत्यामा संलग्न तीनै जनालाई कर्तव्य ज्यान मुद्दामा म्यात थप गरि अनुसन्धान सुरु गरिएको प्रहरीले जनाएको छ । दुलाल र मीनाबीच १० वर्ष पहिले प्रेम विवाह भएको थियो । उनीहरुका ८ वर्षका छोरा छन् ।
