धरान । नेपाल हृदयरोग निवारण प्रतिष्ठान सुनसरी शाखाले आगामी असोज ३ गते हुने विश्व मुटु दिवसको अवसरमा मुटु बचाउन पदयात्रा गर्ने भएको छ ।
शनिबार धरानमा बसेको प्रतिष्ठानको बैठकले सेप्टेम्बर २९ तारिखमा पर्ने मुटु दिवसको अवसरमा साप्ताव्यापी कार्यक्रम गर्ने निर्णय गरेको हो । धरानको सिंहदेवी चोकदेखि विजयपुरको पञ्चकन्यासम्म मुटु बचाउने चेतनामूलक प्ले–कार्डसहित दुई घण्टा पदयात्रा गरिने प्रतिष्ठानका सचिव आशिष मास्केले जानकारी दिए ।
प्रतिष्ठानका अध्यक्ष मुकेश अग्रवालको अध्यक्षतामा बसेको कार्यसमिति बैठकले मुटुलाई स्वस्थ राख्न सामाजिक सञ्जाल र मिडियाहरूमा जनचेतनामूलक सन्देश प्रवाह गर्ने, विभिन्न सामाजिक सङ्घ–संस्थाहरूसँग सहकार्य गरेर मुटुरोग सम्बन्धी स्वास्थ्य शिविर गर्ने निर्णय गरेको छ ।
एक अध्ययनका अनुसार विश्वमा हरेक वर्ष करिब दुई करोड मानिसको मृत्यु मुटुरोग र सम्बन्धित आर्टरीहरूको कारणले हुने गरेको छ । यही कुरालाई मध्य नजर राखेर मुटु रोगबाट बच्ने उपाय, मुटु रोग लागि सकेपछि अपनाउनु पर्ने सावधानी र जटिल मुटु रोगीले के कस्ता कुरामा सावधानी हुनु पर्दछ भनेर प्रतिष्ठानले विभिन्न संस्थाहरूसँग सहकार्य गरेर जनचेतना फैलाउने काम गर्ने अध्यक्ष अग्रवालले जानकारी दिए ।
प्रतिष्ठानकी सल्लाहकार तथा कोशी प्रदेश सभा सदस्य यशोदा कायस्थको विशेष उपस्थितिमा भएको बैठकले सह–कोषाध्यक्षमा देवेन्द्र कार्की र सह–सचिवमा दीभा श्रेष्ठलाई मनोनितसमेत गरेको छ । मुटु रोगबारे जनमानसमा जनचेतना तथा सामाजिक कार्यमा सक्रिय हुने सल्लाहकार कायस्थले सुझाव दिइएकी छन् ।
