धरान । सुनसरीमा लागूऔषध सम्बन्धी दुई फरक घटनामा प्रहरीले ठूलो परिमाणमा गाँजा बरामद गर्नुका साथै एक जनालाई ब्राउनसुगरसहित नियन्त्रणमा लिएको छ ।
प्राप्त विशेष सूचनाका आधारमा शुक्रबार साँझ सुनसरीको बर्जु गाउँपालिका–४ स्थित शान्तिवन चोक नजिकै इलाका प्रहरी कार्यालय सीतागञ्ज र कोशी प्रदेश प्रहरी कार्यालय विराटनगरबाट संयुक्तरूपमा खटिएको टोलीले चेकजाँच गर्ने क्रममा कच्ची सडकको छेउमा रहेको धान खेतमा बेवारिसे अवस्थामा दुई बोरामा प्याक गरिएको गाँजा फेला पारेको हो । पानीले भिजेको अवस्थामा भेटिएको उक्त गाँजाको तौल करिब ७५ केजी रहेको जिल्ला प्रहरी कार्यालय सुनसरीका प्रहरी प्रवक्ता खगेन्द्र भण्डारीले जानकारी दिए ।
त्यसै दिन दिउँसो इनरुवा नगरपालिका–४ बसपार्कचोकमा अस्थायी प्रहरी पोष्ट बसपार्क र जिल्ला प्रहरी कार्यालय सुनसरीको संयुक्त टोलीले सञ्चालन गरेको चेकजाँचका क्रममा पश्चिमबाट पूर्वतर्फ जाँदै गरेका मोरङको सुन्दरहरैंचा–६ निवासी २८ वर्षीय हेमराज विकको साथबाट ४ ग्राम ब्राउनसुगर फेला पारेको प्रहरीले जनाएको छ । उनलाई लागूऔषधसहित नियन्त्रणमा लिई थप अनुसन्धानका लागि जिल्ला प्रहरी कार्यालय सुनसरीमा ल्याइएको प्रहरीले जनाएको छ ।
प्रहरीका अनुसार दुवै घटनामा संलग्नहरूमाथि लागूऔषधसम्बन्धी ऐनअन्तर्गत आवश्यक अनुसन्धान र कारबाही प्रक्रिया अघि बढाइएको छ ।
