दुर्गम पहाडी जिल्ला भोजपुरमा तीन दिनसम्म सञ्चालन भएको आँखा शिविरमा १ सय ३२ जनाको आँखाको शल्यक्रिया भएको छ।
स्थानीय ठाउँमा सञ्चालित शिविरमा आँखाको शल्यक्रिया भएर स्पष्ट देख्न थालेपछि ८० वर्ष नाघेका वृद्धवृद्धा सबैभन्दा धेरै खुसी देखिएका छन्। भोजपुर नगरपालिका दाँवा घर भएकी ८२ वर्षीया लक्ष्मीदेवी चौहानले शिविरमा आँखाको शल्यक्रिया गराएकी छन्। उनले आँखा देख्न थालेपछि भनिन्“हामीलाई आँखा देखाउने डाक्टरलाई राम्रो होस्, आर्शिवाद छ। सधैँ धमिलो आँखा देख्थे अहिले सबै देख्न थालेकी छु ।”
उनि मात्र होइन भोजपुर वडा नम्बर –७ की सीता भुजेल पनि आँखाको शल्यक्रिया भएपछि खुसी व्यत्त गरेकी छन् । त्यसैगरि शिविरमा शल्यक्रिया गराएकी ।पाँचथरकी तुलसी राईले भनिन् “शिविरमा शल्यक्रिया गराएपछि छ्याङ्ग देख्न थालेको छु ।”
शिविरमा भोजपुरसहित जिल्ला बाहिरका नागरिकले पनि सेवा लिएका जिल्लास्थित नेपाल नेत्रज्योति सङ्घका कोषाध्यक्ष सम्झना प्रधानले बताएका छन् । उनका अनुसार शिविरमा ९० वर्षसम्मका वृद्धवृद्धाले सेवा लिएका थिए ।
उपचारका लागि अन्यत्र जान आर्थिक तथा पारिवारिक समस्या हुने भएकाले जिल्लामा सञ्चालन भएको शिविर प्रभावकारी बनेको आयोजक नेपाल नेत्रज्योति सङ्घ आँखा तथा कान उपचार केन्द्र भोजपुरका प्रमुख विजय तामाङले बताएका छन् । उनले भने ५० रुपैया तिरेर वर्षौँदेखि आँखा नदेख्ने समस्या भएका बिरामीलाई शिविरले सुविधा दिएको छ ।”
तामाङका अनुसार विराटनगर आँखा अस्पताल रानी र केन्द्रको आयोजना तथा सिबिएम संस्थाको सहयोगमा सञ्चालित शिविरमा १ सय ३२ जनाको आँखाको शल्यक्रिया गरिएको छ भने पाँच सय २१ जनाको परीक्षण गरिएको छ।
आर्थिक अवस्था कमजोर भएका, जेष्ठ व्यक्ति तथा अन्य विविध कारणले वर्षौँदेखि आँखाको समस्या झेल्न बाध्य नागरिकलाई आफ्नै पालिकामा सञ्चालित शिविरले लाभ पुर्याएको सघंका संस्थापक सदस्य धर्मराज राईले बताए। “शिविरमार्फत हाम्रा वृद्ध आमाबुबालाई पुनःस्पष्ट देख्ने भएकाले उहाँहरुसँगै हामी पनि खुसी छौँ”, उनले भने
विपन्न र दुर्गम भेगका अशक्त नागरिकलाई लक्षित गरी भोजपुरमा निःशुल्क आँखाको शल्यक्रिया गर्ने उद्देश्यले शिविर सञ्चालन गरिएको नेत्ररोग विशेषज्ञ डा सगुन मल्लले जानकारी दिएका छन्। “आर्थिक अवस्था कमजोर भएका र अशक्त नागरिकका लागि सहज उपचार सेवा दिन हामीले शिविर सञ्चालन गरेका हौँ”, उनले भने, “वर्षौँदेखि आँखाको समस्या लिएर आउने बिरामीलाई हाम्रो टोलीले सफल उपचार गरेको छ ।” शिविरमा मल्लसहित नौ जना चिकित्सकको सहभागिता रहेको थियो ।
