नेपाली कथानक चलचित्र ‘एक भागवत् र एक गीता’ को आजदेखि प्रदर्शन सुरु भएको छ । धरानस्थित फ्रेण्ड्स सिनेमामा दिउँसो १ः१५ बजे र ६ः३० बजेको शो लाग्दै छ ।
आउँदो हरितालिका तीजलाई लक्षित गर्दै चलचित्र प्रदर्शन गरिएको छ । सामाजिक विषयवस्तुमा आधारित भए पनि प्रस्तुतीकरणका कारण चलचित्रका प्रतिक्षित बन्न पुगेको छ ।
फ्रेण्डस् सिनेमाका सञ्चालक पुष्कर घिमिरेले चलचित्र प्रदर्शनबारे जानकारी दिए ।
नेपाली चलचित्रमा नामभन्दा पनि निर्वाह गरेको भूमिकामार्फत चिनिने अभिनेतामध्येका एक विपीन कार्कीले चलचित्र ‘एक भागवत् र एक गीता’ (सामाजिक प्रेमकथा)’ मा ‘कमलामाई’ को भूमिकामार्फत यौनिक लैङ्गिक अल्पसङ्ख्यक समुदायको जीवनलाई प्रस्तुत गरेका छन् ।
‘एउटा कलाकारले यस किसिमको भूमिकामार्फत आफूले फरक जीवन बाँच्नुका साथै दर्शकलाई पनि त्यो महसुस गराउन सक्छ । अभिनयमा विविधता खोजिरहँदा यस्ता भूमिका अवसर र चुनौती दुवै हुन्’, अभिनेता कार्कीले भने, ‘मैले आफ्नो पात्रमार्फत उक्त समुदायको दबिएका कथालाई पर्दामार्फत व्यक्त गर्ने अवसर पाएको छु ।’
चलचित्रमा अभिनेता कार्कीसँगै धीरज मगर, सुहाना थापा, कविर खड्का, जेविश श्रेष्ठ र जेविन श्रेष्ठ, सञ्जोग रसाइली, मुकेश झालगायत कलाकारले अभिनय गरेका छन् ।
सुनिलकुमार थापाले निर्माण गरेको चलचित्रमा निर्देशक थापासँगै सरिन पोखरेल, परिच्छेद सेन, पुरुषोत्तम ढुङ्गेलको पटकथा, राजेश श्रेष्ठको छायाङ्कन, मित्र डी गुरुङको सम्पादन तथा हिमाल केसीको द्वन्द्व निर्देशन रहेको छ ।
आजैदेखि ‘नाङ्गो गाउँ’
आजैदेखि राष्ट्रिय चलचित्र पुरस्कार विजेता निर्देशक दीपेन्द्र लामाले निर्देशन गरेको चलचित्र ‘नाङ्गो गाउँ’ समेत प्रदर्शन हुँदैछ । धरानस्थित फ्रेण्ड्स सिनेमामा चलचित्रले दुई शो गर्दैछ । बिहान १०ः३० र अपराह्न ३ः४५ बजे चलचित्र चल्दैछ ।
समाजलाई परिवर्तन गर्न राजनीतिको आवश्यकता र गाउँ पातलो हुँदै गएको विषयवस्तु देखाइएको छ ।
‘हामीले नेतामात्र नभई छान्ने जनतालाई पनि प्रश्न गर्ने बेला भएको छ, त्यसको सुरुआत यस चलचित्रमा गरिएको छ’, निर्देशक लामाले भने, ‘यसमा सामाजिक र राजनीतिक परिवेशलाई उजागर गरिएको छ, हाम्रो समाजको राजनीतिक चेत, राजनीतिक प्रभाव र समाजभित्र हामी कस्तो अवस्थामा बसेका छौँ भन्ने यसमा देखाइएको छ ।’
चलचित्रमा दयाहाङ राई, मिरुना मगर, शिशिर वाङ्देल, कर्मा, साम्राज्ञी राज्यलक्ष्मी शाह, बुद्धि तामाङ, रवीन्द्र झा, विशाल पहारी, राज थापा, कमलमणि नेपाल, अङ्कित खड्का, पुष्कर गुरुङलगायत कलाकारले अभिनय गरेका छन् । यसको कथा स्वयम् निर्देशक लामाले लेखेका हुन् ।
