कोरोना संक्रमणको दोस्रो लहर तीव्र गतिमा फैलिरहँदा सुनसरी प्रशासनले आंशिक निषेधाज्ञालाई खारेज गर्दै पूर्ण रुपमा निषेधाज्ञा जारी गरेको छ ।
शहर सुनसान प्रायः छन् तर भित्री बजारहरुको भीड नियन्त्रण हुन सकेको छैन । विशेषगरी कृषि बजार र तरकारी बजारको भीड नियन्त्रण गर्न र सहज बिक्री वितरण गर्न स्थानीय प्रसाशन उदासिनजस्तै देखिएको छ ।
धरानस्थित भानुचोकमा रहेको तरकारी बजार कोरोना संक्रमणको केन्द्र (हटस्पट) बन्ला कि भन्ने त्रास उत्पन्न भएको छ ।
प्रशासनले अत्यावश्यक वस्तु खरिद गर्नका लागि बिहान १० बजेसम्मको समयसीमा दिएको छ । तर, यही समयमा तरकारी बजारमा भीडभाड बढेको देखिएको छ । स्वास्थ्य सुरक्षाको कुनै पनि नियम अपनाइएको छैन । मास्क भने लगाएको देखिएको छ । तर भौतिक दूरी, सेनिटाइजरलगायतका सावधानी अपनाएको देखिएको छैन ।
जिल्ला प्रशासन कार्यालय सुनसरीले मध्यरातिबाट पूर्ण निषेधाज्ञा जारी गरेपछि धरानको भानुचोक सुनसान छ तर भित्री बजार भने अव्यवस्थित रुपमा भीडभाड छ ।
यस अघिको आंशिक निषेधाज्ञामा जोरबिजोर प्रणालीअनुसार सवारी साधन सञ्चालन गर्न दिएको थियो तर कोरोना संक्रमणदर बढ्दै गएपछि मंगलबार डिसिसिएमसीको बैठकले गए राति १२ बजेबाट पूर्ण रुपमा निषेधाज्ञा गर्ने निर्णय गरेको थियो ।
निषेधाज्ञापछि धरानको भानुचोक भएर सञ्चालन हुने लामो तथा छोटो दूरीका यातायात बन्द छन् । धरानभित्रै सञ्चालन हुने टेम्पो, सफारी तथा अन्य सवारी साधनलाई पनि रोक लगाइएको छ ।
जिल्ला प्रसासन कार्यालयले औषधी, खाद्यवस्तु तथा अत्यावश्यक वस्तु तथा सेवा खरिदबाहेक घर बाहिर निस्कन रोक लगाएको छ ।
औषधिबाहेकका अत्यावश्यक वस्तुको खरिद, बिक्रीका लागि बिहान ६ बजेदेखि १० बजेको समय तोकिएको छ ।
हेर्नुहोस् तस्बिरमा भानुचोकको तरकारी बजार र पूर्ण निषेधाज्ञाको पहिलो दिन धरानका केही तस्बिरः
प्रस्तुत समाचार सामग्री (भिडियाे तथा तस्बिरहरू) लिंदा वा तयार गर्दा स्वास्थ्य सामग्रीकाे प्रयाेग गरी, भाैतिक दूरी कायम गरी, स्वास्थ्य सावधानीका उपाय अवलम्वन गरिएकाे छ ।
(प्रस्तुत भिडियो र तस्बिर फेसबुक इन्स्ट्यान्ट आर्टिकलका कारण नदेखिएमा गुगल क्रोम लगायतका इन्टरनेट ब्राेउजरबाट ब्लाष्टखबरडटकम लगइन गरेर हेर्न सक्नुहुने छ ।)