धरान । २०६६ सालमा आफ्नै तीन महिनाको छोराको घाँटी थिची हत्या गरेर भागेका एक पुरुष ११ वर्षपछि पक्राउ परेका छन् ।
आफ्नै छोरा दिलसाह मियाँको हत्या अभियोगमा फरार रहेका सुनसरीको हाल भोक्राहा नरसिंह गाउँपालिका १९ (साविक नरसिंह गाविस–४) वस्ने ५१ वर्षीय बुनिया भन्ने करीम मियाँ पक्राउ परेका हुन् ।
माइतीघरमा बस्दै आएकी कान्छी श्रीमती अजिरन खातुनलाई लिन २०६६ साल मंसिर २२ गते ससुरालीघरमा गएका उनले श्रीमतीसंग वादविवाद भए पछि छोरा छोरीलाई लिई घर फर्कदै गर्दा बाटोमा श्रीमतीलाई कुटपिट गरी बेहोस बनाएको र छोराछोरीलाई घाँटी थिची केराबारीमा फालिदिएपछि ३ महिनाको छोरा दिलसाहको मृत्यु भएको भन्दै उजुरी परेको थियो ।
उनकै कान्छि श्रीमती अजिरनले जिल्ला प्रहरी कार्यालय सुनसरीमा उजुरी दिएपनि उनी भागेपछि पक्राउ परेका थिएनन् । घटनापछि नेपालका विभिन्न ठाउँमा लुकिछिपी बस्दै आएका उनलाई प्रहरीले यहि कार्तिक १७ गते इनरुवाबाट पक्राउ गरेको हो । प्रहरीले पक्राउ परेका मियाँको कानुनी प्रक्रिया सुरु भएको बताएको छ ।
