धरान/झापाको बिर्तामोडमा २२ वर्षीया एक महिलाको सङ्कास्पद मृत्यु भएको छ ।
बिर्तामोड–४ अदुवाखोलाकी रोशनी साह रौनियारको दाइजोको निहुँमा हत्या गरी झुण्ड्याएको पीडित परिवारको दाबी छ । रोशनीको मङ्लबार साँझ ४ बजेतिर घर मै झुण्डिएको अवस्थामा शव फेला परेको थियो । त्यसदिन छठ पर्व रहेको थियो । मृतक रोशनीको ८ महिनाको छोरो छ । मृतकका बुबा अशोक साह रौनियारले छोरीलाई हत्या गरी आत्महत्या गरेको भन्ने बनाउन घरमा झुण्ड्याएको दाबी गरे ।
तर, पीडक पक्ष भने उनको दाबीलाई मान्न तयार छैनन् । पीडक परिवारका अनुसार रोशनीले यसअघि तीनपटक आत्महत्याको प्रयास गरेकी थिइन् । ‘यो चौथो पटक हो ।’ सासु सावित्रा साह रौनियारले भनिन् । उनका अनुसार छोरो जन्माएपछि बुहारी रोशनी अचानक मानसिक रोगबाट गुज्रिएकी थिइन् । चिकित्सकलाई यसबारे बुझ्दा सयौंमध्ये एकमा यस्तो रोग देखापर्ने बताएको उनले बताइन् ।
बीपी कोइराला स्वास्थ्य विज्ञान प्रतिष्ठानका प्रसुति विभागका चिकित्सकहरूका अनुसार प्रशुति पछि हुने यस्तो खाल्को समस्यालाई ‘पोष्टपार्टम साइकोसिस’ भनिन्छ । यो समस्या २५ देखि ३० प्रतिशत गर्भवती महिलामा देखा पर्न सक्ने अनुसन्धानले देखाएको चिकित्सक बताउँछन् । त्यसमध्ये ५–१० प्रतिशतमा लामो समयसम्म पूर्णतया रोग निको हुँदैन । बेलायतको लण्डनस्थित रोयल कलेज अफ साइक्याट्रिक लेख्छ, ‘प्रत्येक सय गर्भवती महिलामध्ये १० देखि १५ जनामा यो समस्या देखिन्छ ।’
मानसिक समस्या किन हुन्छ भन्नेबारेमा जानकारी लिङ्कः https://www.rcpsych.ac.uk/expertadvice/problemsdisorders/postpartumpsychosis.aspxइलाका प्रहरी कार्यालय बिर्तामोडले पनि हत्या वा आत्महत्या हो त्यसबारे पोष्टमार्टमको रिपोर्ट नआइञ्जेल बताउन नसक्ने जनाएको छ । इप्रका बिर्तामोडका प्रमुख डिएसपी कृष्ण कोइरालाले फोन सम्पर्कमा भने, ‘पोष्टमार्टम रिपोर्ट नआइञ्जेलसम्म यसैभन्न सकिदैन ।’
पीडित परिवारले इप्रका बिर्तामोडमा ज्वाइ सुरज साह रौनियार, सासु सावित्रा, देवरलगायतको नाममा किटानी जाहेरी दिएको छ । ‘बुधबार किटानी जाहेरी दिएका छौं ।’ मामा रणधीर गुप्ताले फोनसक्पर्कमा भने । उनले पनि ज्वाइले आफूसँग आएर कहिले मोटरसाइकल, कहिले ३ लाख रुपैयाँ माग्ने गरेको दाबी गरे । जाहेरी दिए पनि प्रहरीले कारबाही प्रक्रियाअघि नबढाएको पीडित परिवारको आरोप छ ।
रोशनीको धरानस्थित बीपी कोइराला स्वास्थ्य विज्ञान प्रतिष्ठानमा बिहीबार पोष्टमार्टम भएको छ । तर, रिपोर्ट आउन केही दिन लाग्ने भएकाले पनि घटनाको तथ्य बाहिर आउन केही समय लाग्ने भएको छ । पीडित परिवार भने पटक–पटक दाइजोका लागि दवाव दिँदै आएकाले हत्या नै गरेको बताउँछन् । मृतकका बुबा अशोकले आफूसँग पनि धेरैपटक छोरी पैसा माग्न अाएकाे बताए ।
‘म सागसब्जी बेच्ने मान्छे, मसँग कहाँबाट पैसा हुन्छ ? । छोरी घरमा पैसा भन्दै आउँथिन् ।’ उनले ब्लाष्टकर्मीसँग भने, ‘एकपटक ३ लाख रूपैयाँ चाहियो भन्दै आइन् ।’ उनले आफ्नो छोरीलाई हत्यापछि झुण्डाएको दाबी गरे । रोशनी झुण्डिएको स्थान टेबल तथा कुर्सी राखेपछि पनि भेट्न नसकिने अवस्था रहेकाले हत्याको आशङ्का रहेको उनका मामाहरू बताउँछन् ।
प्रहरीले रोशनीको शव जनप्रतिनिधि, स्थानीयको रहोबरमा निकालेको थियो । रोशनी झुण्डिएको समय र मितिमा उनको श्रीमान साथमै रहेका थिए । ‘म छठ मान्नको लागि छोरीको घर भद्रपुरतिर गएको थिएँ ।’ सासु सावित्रा भन्छिन्, ‘खोला पस्न लाग्दा छिमेकीले मलाई फोन ग¥यो । र छठ नमानी फर्किएँ ।’ उनले बुहारी रोशनीसँग कुनै पनि खाल्को यातना तथा एक रूपैयाँ पनि दाइजो नमागिएको दाबी गरिन् । सुरज भने इलाममा फलफूल बेच्दै आएका छन् ।
