काठमाडौँ / राप्रपा नेपाल (समानान्तर) ले आफ्नो पार्टीको कुनै पार्टीसँग पनि एकता नभएको स्पष्ट पारेको छ ।
सोमबार आयोजित पत्रकार सम्मेलनमा पार्टीका अध्यक्ष गणेश शेरचनले आफ्नो पार्टीको अहिले कहीँकतै एकीकरण नभएको बताउँदै पार्टीको अनुशासन विपरीत कार्यगरी कारबाहीमा परेका केही नेताले सो पार्टी राप्रपामा विलय भएको हल्ला चलाएकामा खेद व्यक्त गरे । उनले भने, “हाम्रो सिद्धान्त भनेको संवैधानिक राजतन्त्र, हिन्दूधर्म र अखण्ड नेपाल हो, यो सिद्धान्तलाई परित्याग गरी कसैसँग पनि एकीकरण हुन सक्दैन ।” मुलुकका पाँच क्षेत्रमा सङ्गठन सुदृढीकरणका लागि अभियान चाँडो सुरु गर्न लागेको बताउँदै उनले हिन्दू जागरणका कार्यक्रम समेत सञ्चालन गरिने जानकारी दिए । पार्टीका नेता तीर्थ श्रेष्ठले नयाँ संविधानलाई सबै नेपालीले स्विकार गर्न नसकेको बताउँदै असन्तुष्ट पक्षको भावनालाई समेत सम्बोधन गर्न माग गरे । पार्टीले यसअघि सत्यमान लामा, श्याम तिमिल्सिना र सगुन लावतीलाई अनुशासन, विधान, नीति र आचरणविपरीत काम गरेको भन्दै साधारण सदस्यता समेत नरहने गरी निष्कासन गरेको थियो । सो पार्टीले विसं २०७० मा राप्रपा नेपालबाट अलग्गिएर राजनीतिक गतिविधि सञ्चालन गर्दै आएको छ ।
