विराटनगर । मोरङको कानेपोखरी गाउँपालिकामा विकास निर्माणका काममा कमसल सामान प्रयोग भएको पाइएको छ ।
कानेपोखरी गाउँपालिका–४ मा निर्माणाधीन नालामा गुणस्तरहीन काम भएको स्थानीयवासीले बताएका हुन् । नालाका लागि प्रयोग गरिएको सामग्री कमसल भएको भिडियो सामाजिक सञ्जालमा भाइरल भएपछि स्थानीयस्तरमा चर्को विरोध भएको छ । प्राविधिकहरूको टोलीले स्थलगत निरीक्षण गरी उक्त कामको गुणस्तर परीक्षण गर्दा निर्माण कम्पनीले मापदण्ड विपरीत काम गरेको पुष्टि भएको छ ।
गाउँपालिकाका उपाध्यक्ष भोलाप्रसाद अधिकारीका अनुसार करिब एक सय मिटर लामो नाला निर्माणमा सिमेन्टको न्यून प्रयोग, माटो मिसिएको बालुवा र ठूला–ठूला ढुङ्गा प्रयोग गरेको पाइएको बताए । ‘प्राविधिक परीक्षणबाट नै यो कुरा पुष्टि भएपछि हामीले तत्काल निर्माण कार्य रोकेर पहिले निर्माण गरिएको संरचना भत्काउन निर्देशन दिएका छौं’–उपाध्यक्ष अधिकारीले भने । उक्त नाला भत्काएर शनिबारदेखि पुनः नाला निर्माणको काम थालिएको उनले जानकारी दिए ।
अलि बिल्डर्स कम्पनी इनरुवाले गत आर्थिक वर्षमा कानेपोखरी गाउँपालिकासँग वडा नम्बर ४ को गुरुङ चोकदेखि दक्षिणतर्फ पाँचसय मिटर डे«न (नाला) निर्माणको ठेक्का लिएको थियो । स्थानीय विवादका कारण काम रोकिएपछि गाउँपालिकाले म्याद थप गरेर यो आर्थिक वर्षभित्र सम्पन्न गर्ने गरी अनुमति दिएको थियो ।
सोही कम्पनीले कानेपोखरीको वडा नम्बर ६ र ७ मा पनि पाँचसय मिटरका दरले नाला निर्माणको जिम्मा पाएको छ । गाउँपालिकाका अनुसार तीनै स्थानमा गरी एकहजार पाँच सय मिटर लामो नालाको निर्माण कार्यका लागि करिब एक करोड १० लाख रुपैयाँमा सम्झौता भएको छ ।
गाउँपालिकाका इञ्जिनियर दीपक गुरागाईंका अनुसार नाला निर्माणमा ६ देखि ८ मिलिमिटरसम्मका ढुङ्गाको प्रयोग गर्नुपर्नेमा ठेकेदारले एकसय किलोग्रामभन्दा बढी तौल भएका ठूला ढुङ्गाहरू प्रयोग गरेको पाइएको छ । ‘निर्माण कम्पनीले काम छिटो सम्पन्न गर्ने नाममा मापदण्ड विपरीत काम गरेको स्पष्ट देखियो’–गुरागाईंले भने । स्थानीय बासिन्दाहरूले यस्तै प्रकारको गुणस्तरहीन काम अन्य स्थानमा पनि भएको हुनसक्ने आशङ्का व्यक्त गरेका छन् ।
उनीहरूले यसअघि निर्माण भइसकेका संरचनाहरूको पनि प्राविधिक परीक्षण गर्न माग गरेका छन् । ‘अहिले देखिएको यो एउटा नालामात्र होइन, यही कम्पनीले अन्य वडामा पनि निर्माण गरेका नालाहरूको गुणस्तर के कस्तो छ भन्ने कुरा पनि जाँच हुनुपर्छ’–स्थानीय महेन्द्र गुरुङले भने ।
गाउँपालिकाले अब पुनः निर्माण भइरहेको नालाको कडाइका साथ अनुगमन गर्ने र गुणस्तर सुनिश्चित भएपछि मात्र भुक्तानी दिने प्रतिबद्धता जनाएको छ । ‘हामीले प्राविधिक टोलीमार्फत् निरन्तर अनुगमन गरिरहेका छौं र मापदण्ड अनुसारको काम भएपछि मात्रै भुक्तानी प्रक्रिया अगाडि बढाउनेछौं’–उपाध्यक्ष अधिकारीले बताए ।
यो घटनाले स्थानीय सरकारद्वारा सञ्चालित विकास निर्माणमा हुने गरेको अनियमितता र निगरानीको अभावलाई उजागर गरेको छ । स्थानीय सचेतता र नागरिक खबरदारीले यस्ता अनियमितता रोक्न महत्वपूर्ण भूमिका खेल्ने देखिएको छ ।
