ज्येष्ठ नागरिकको सारथी मिलन केन्द्र

मिलन केन्द्र दिनहुँ १० बजेदेखि ५ बजेसम्म सञ्चालन गरिन्छ । केन्द्रमा ज्येष्ठ नागरिकका लागि समितिद्वारा निःशुल्क सेवा प्रवाह गरिएको छ । “चिया तथा खाजा खुवाउन मासिक रु तीन लाखदेखि रु चार लाखसम्म खर्च लाग्छ,” उनले भने । विभिन्न व्यक्ति तथा संस्थाबाट सहयोग प्राप्त भइरहेको श्रेष्ठले बताए।

केन्द्र सञ्चालनका लागि अक्षयकोष स्थापना गरिएको छ । हालसम्म उक्त कोषमा रु सात लाख सङ्कलन भइसकेको छ । यस वर्ष केन्द्रका लागि महिला विकास शाखा, कास्कीबाट रु तीन लाख प्राप्त हुँदै छ । जिविसले रु ७५ हजार बजेट छुट्याएको छ । “दीर्घकालीन रुपमा केन्द्र सञ्चालन गर्न सरकारसँग पहल भइरहेको छ,” उनले भने ।

ज्येष्ठ नागरिकको एक्लोपन हटाउन केन्द्र सञ्चालनमा ल्याइएको हो । उमेरका कारण अन्य काम गर्न पनि नसकिने अवस्थामा समय बिताउन र आफ्नो उमेर समूहका दौँतरी साथीसँग भेट्न पाउने भएका कारण केन्द्र ज्येष्ठ नागरिकका लागि सारथी जस्तै बनेको श्रेष्ठको भनाइ छ । विन्ध्यवासिनीमा जस्तै देशका अन्य ठाउँमा यस किसिमका केन्द्र सञ्चालनको आवश्यकता रहेको उनको भनाइ छ । केन्द्रमा आउने ज्येष्ठ नागरिक दिनभर केन्द्रमा बसेर बेलुका घर फर्कने गरेका केन्द्रका कर्मचारी नवराज तिमल्सिना बताउछन् । उनीहरुले दिउँसो भजन कीर्तन, प्रवचन सुन्नुका साथै टेलिभिजन हेर्ने, बाघचाल, लुडो खेल्ने गर्छन । महिनामा एकपटक पोखराभित्रका विभिन्न स्थानको भ्रमणसमेत गराइन्छ । दुई–दुई महिनाको अवधिमा ज्येष्ठ नागरिकको स्वास्थ्योपचार गरिन्छ । केन्द्र सञ्चालनले आफूजस्तै अन्य ज्येष्ठ नागरिकमा खुसी ल्याएको पोखराका केआइसिंह पुल क्षेत्रका ८० वर्षीया विष्णुमाया केसी बताए । “यहाँ आएपछि शान्ति मिल्छ,” उनले भने । पोखराको मान सडकका ७३ वर्षीय इन्द्रबहादुर कार्की केन्द्रमा आफ्ना उमेर समूहका साथीसँग भेट गर्न पाउँदा छुट्टै किसिमको आनन्द मिल्ने गरेको र भेटघाटका कारण एक्लोपनको महसुस हुन छाडेको बताए ।

रासस