मोरङ० / मधेसी जनअधिकार फोरम लोकतान्त्रिकका अध्यक्ष विजयकुमार गच्छदारले नेपाली काँग्रेस–माओवादी केन्द्रसँग मधेसी मोर्चाले गरेको तीनबुँदे सहमति मधेसको हितमा नभएको बताएका छन् । विराटनगर विमानस्थलमा आज पत्रकारसँग कुराकानी गर्दै उनले मधेसी मोर्चाले प्रधानमन्त्री हटाउन र प्रधानमन्त्री बनाउन मात्र तीनबुँदे सहमति गरेको आरोप लगाउँदै त्यो मधेसमा हितमा नभएको बताए ।
उनले मधेसको समस्या समाधान गर्न र संविधानको सफल कार्यान्वयनका लागि पनि नेपाली काँग्रेस, नेकपा एमाले, नेकपा माओवादी र मधेसी मोर्र्चाबीच सहमति आवश्यक रहेको बताए । अध्यक्ष गच्छदारले संविधान निर्माण आफूका लागि महत्वपूर्ण भूमिका निर्वाह गरेको र आफ्नो पार्टीलाई सरकारमा सहभागी हुन नदिन केही पार्टी र केही ठूला व्यक्तिले षड्यन्त्र गरिरहेको बताए ।
संविधान कार्यान्वयन र मुलुकको समस्या समाधानका लागि मुख्य दलहरुबीच राष्ट्रिय सहमति आवश्यक रहेको भन्दै अध्यक्ष गच्छदारले नेपाली काँग्रेस र नेकपा माओवादी केन्द्र मिलेर सरकार बनाउँदैमा समस्याको समाधान नहुने जिकिर गरे । रासस
